Қарағанды облысында су тасқынының шарықтау шегі алдағы мереке күндеріне дөп келеді. Бұл жағдай су басудың алдын алу үшін күшейтілген жұмысты талап етеді, деп хабарлайды Todayinfo ақпарат агенттігі.
Премьер-министрдің орынбасары Қанат Бозымбаевтың сөзінше, облыстың кейбір аудандарында қар астында мұз қабаты пайда болған. Егер күн күрт жылынса, еріген қар суы жерге сіңбей, ауылдарды су басу қаупін тудырады. Әкімдер су жиналуы мүмкін ойпаң жерлерді анықтап, суды төмен қарай ағызу үшін бөгеттер, арналар мен арықтар салу туралы тапсырма берген.
Бозымбаев Қарағанды облысын әуеден барлап, жерден аралап шыққанын және әкімдер салуы тиіс құрылыстардың орнын белгілегенін айтты. Қазір Ұлытау облысында тасқын маусымы аяқталып келеді, ал солтүстікте қар әлі жатыр.
"Қарағандыда қазір басталды, алдағы аптадағы мереке күндері нағыз шегіне жетеді. Одан кейін Ақмола мен Абай облыстарында болады. Шамамен бір аптадан соң Солтүстік Қазақстан облысында басталуы мүмкін. Ал сәуір айында Шығыс Қазақстан облысына жетеді. Қауіп барлық жерде бар", - деді вице-премьер үкіметте өткен брифингте.
Ол бүкіл ел бойынша штабтар құрылып, күштер мен құралдардың саны нақтыланғанын, ақша бөлінгенін жеткізді. Қажет болған жағдайда жедел көмек көрсетуге 12 мыңға жуық техника мен 39 мың адам дайын тұр.
Фото: Әлеуметтік желіден
