Қазақ әншілерінің құқығы қалай қорғалады

Фото: © istockphoto.com Үкімет отырысында Әділет министрі Ерлан Сәрсембаев зияткерлік меншік құқығын реттеу мәселесін көтеріп, бұл саланы цифрландыру қажеттігін атап өтті, деп хабарлайды Todayinfo ақпарат агенттігі.

«2024 жылдың күзіне Meta платформаларынан қазақстандық музыканың алынып тасталуы ұжымдық басқару жүйесіндегі кемшіліктерді көрсетті. Көптеген авторлар мен орындаушылар өз шығармалары үшін сыйақы алмағандары туралы шағымданды. Осыған байланысты, бұл саланы цифрландыру қажет. Авторлар мен құқық иеленушілер барлық процесті онлайн бақылау мүмкіндігіне ие болады», – деді министр.

Министрдің айтуынша, келісімшарт жасау, сыйақыны жинау, бөлу және төлеу кезеңдерін онлайн бақылау жүйесі әзірленіп жатыр. Сонымен қатар, жасанды интеллект элементтері бар цифрлық платформа енгізу, талдау және есептілік жүйесін дамыту, зияткерлік меншік нысандарын тіркеу бойынша іздеу жүйелерін жетілдіру, мобильді қосымша жасау және халықаралық ұйымдардың ақпараттық жүйелерімен интеграцияны кеңейту жоспарланған.