2026 жылға дейін Қазақстанның авиапаркі тоғыз жаңа ұшақпен толығып, ел ішінде және халықаралық бағыттар бойынша рейстер саны артпақ. Бұл туралы Азаматтық авиация комитетінің төрайымы Салтанат Томпиева мәлімдеді.
Аталған бастама ішкі туризмді дамытуға, әлеуметтік маңызы бар бағыттарда қолжетімділікті арттыруға бағытталған.
Бұл туралы Todayinfo.kz ақпарат агенттігі хабарлайды.
2023 жылдың соңына дейін әуекомпаниялардағы ұшақтар саны 118-ге жеткізіледі. Сонымен қатар, мемлекет тарапынан әлеуметтік бағыттағы 23 әуе рейсіне субсидия беру бағдарламасы жалғасады.
Қандай инфрақұрылымдық өзгерістер күтілуде?
Астанада және Шымкентте екінші ұшу-қону жолағын салу 2026 жылы басталса, Алматы халықаралық әуежайында ішкі рейстер терминалы жаңғыртылады. Ал Ақтау әуежайында перронға күрделі жөндеу жасалады.
Халықаралық рейстер қай жақтарға ашылады?
Орталық Азия мен ТМД елдеріне бағыттар жиілеп, Еуропа, Азия және Таяу Шығысқа да жаңа рейстер ашылмақ. Атап айтқанда, Токио, Вена, Рим, Абу-Даби, Эр-Рияд, Даммам, Ларнака, Амман, Сиань, Шанхай, Үрімші, Қашғар және Варшава бағыттары қолжетімді болады.
Аталған шаралар Қазақстанның әуе байланысын нығайтып қана қоймай, туризм саласының дамуына серпін береді.
