Қазақстан – Starlink Direct-to-Cell технологиясын сәтті сынақтан өткізген әлемдегі алғашқы елдердің бірі.
Тестілеу нәтижесінде қарапайым смартфонмен спутник арқылы хабарлама жіберіп, қоңырау шалуға мүмкіндік туды.
Жаңа байланыс форматы SpaceX компаниясына тиесілі Starlink спутниктері арқылы жүзеге асты. Тестке Қазақстанның цифрлық даму министрі Жаслан Мәдиев, Beeline Қазақстан президенті Евгений Настрадин және SpaceX мамандары қатысты.
Олар қарапайым ұялы телефон арқылы қосымша құрылғысыз-ақ спутниктік желіге қосылып, хабарлама жіберіп, қоңырау шалуға болатынын көрсетті.
Бұл – Орталық Азиядағы алғашқы осындай тәжірибе. Қазақстан осы технологияны ресми түрде сынақтан өткізген аймақтағы жалғыз ел болып отыр.
Бұл байланыс технологиясы не береді?
Direct-to-Cell жүйесі ұялы телефондарды тікелей спутникке қосуға мүмкіндік береді. Бұл байланыс базалық станциялар жетпейтін таулы, шөлді немесе шалғай ауылдарда да жұмыс істейді.
Яғни, енді байланыс шекарасы кеңейіп, бүкіл ел аумағында тұрақты сигнал қамтамасыз етілуі мүмкін.
Қашан іске қосылады және кімдерге қажет?
Жоспар бойынша, 2026 жылдың ақпанында бұл технология Қазақстанда толық енгізіледі. Ал 2027 жылға қарай барлық негізгі функциялар қолжетімді болмақ:
-
бастапқы кезең – SMS жіберу
-
кейінірек – қоңыраулар мен басқа да сервистер іске қосылады
Сарапшылар бұл мүмкіндік ең алдымен құтқару қызметі, дәрігерлер, туристер және шалғай елді мекен тұрғындары үшін өте маңызды екенін айтады.
Цифрлық даму министрі Жаслан Мәдиевтің айтуынша, "Спутниктік байланыс – цифрлық мемлекет құрудағы басты тетіктердің бірі. Төтенше жағдай кезінде байланыста болу – өмірлік маңызды".
