900 мың теңге: Қазақстанда мерекеден кейін үй жинау қызметі қымбаттады

Жаңа жылдық отырыстар аяқталып, көпшілік үйін ретке келтіре бастады. Бұл кезде клининг қызметтеріне сұраныс күрт артады, себебі мереке кезіндегі шаршау мен әбігер халықты таза әрі жайлы ортаға қайта оралуға итермелейді. Todayinfo.kz ақпарат агенттігі үй тазалау қызметіне сұраныстың күрт артқанын анықтады. Қазіргі таңда клининг компаниялары үш түрлі үй жинау қызметін ұсынады. Біріншісі — жеңіл тазалық: еденді жуу, ванна мен әжетхананы жинау. Орта деңгейдегі қызметке терезе, есік жуу, асүй және жиһаздарды тазалау енеді. Ал ең көлемді және қымбат қызмет — жөндеуден кейінгі тазалық, себебі арнайы құралдар мен кәсіби тәсілдер қажет.

Қай өңірде тазалық бағасы қанша тұрады?

Алматыда жеңіл тазалау 17 мыңнан бастап, толық тазарту 700 мың теңгеге дейін, жөндеуден кейінгі жинау 1 миллион теңгеге дейін жетеді. Астанада да жағдай ұқсас: қызмет құны 19 мыңнан басталып, жөндеуден кейін тазартып беру 900 мың теңгеге дейін барады. Атырау мен Шымкентте де баға қымбат. Мұнда толық тазалау 500 мың теңгеге, ал жөндеуден кейінгі қызмет 600 мың теңгеге дейін бағаланады. Бұл өңірлердегі жоғары баға тұрғындардың төлем қабілеттілігі мен сұранысқа байланысты.

Бағасы қолжетімді қалалар қайсы?

Қарағанды, Тараз, Павлодар, Семей сияқты орташа деңгейдегі қалаларда жеңіл тазалау 15–25 мың теңге аралығында. Толық жинау — 28-40 мың теңге шамасында. Ал жөндеуден кейін тазалау 250-500 мың теңгеге дейін баруы мүмкін. Көкшетау, Петропавл, Ақтау, Жезқазған сияқты қалаларда баға біршама төмен: қарапайым тазарту — 10–20 мың теңге, толық тазарту — 100–150 мың теңге. Жөндеуден кейінгі қызмет құны — 150–300 мың теңге. Жалпы алғанда, Қазақстанда үй көлеміне және тазалау түріне байланысты үй жинау қызметі 10 мың теңгеден басталып, 1 миллион теңгеге дейін жетеді. Бұл қызметті уақытты үнемдеп, кәсіби тазалық нәтижесіне қол жеткізгісі келетіндер таңдайды.