Махрға iPhone емес, қаржылық кепіл сұрау маңызды - қаржыгер

Қаржыгер Әсем Исмағұлова қазақстандық қыз-келіншектерге махрды сәнді гаджетке емес, ұзақмерзімді пайда әкелетін активке айналдыруды ұсынды. Бұл кеңес әсіресе отбасылық тәуекелдерге (ауру, ажырасу, асыраушыдан айырылу) қарсы қаржылық қор құруды қалайтын әйелдер үшін маңызды, деп хабарлайды Todayinfo.kz ақпарат агенттігі. Маманың айтуынша, бұрын махр әйелдің өмірлік сақтандыруы болған. Ата-бабаларымыз мал немесе пайдалану мерзімі ұзақ дүниелерді сыйға тартқан. Ал қазір қыздар iPhone не сәнді сөмке сұрап жатады. Бірақ жыл өте смартфон ескіреді, ал мысалы, құнды қағаздар өсім беріп тұрады, кәсіби курстар болашақ табысқа жол ашады.

Қаржылық еркіндікке апарар махр қандай болу керек?

Исмағұлова махрды "жеке алтын парашют" деп атайды. Яғни, әйел адам үшін қауіп төнген жағдайда тірек болар қор. Көптеген корпорацияда осындай төлем жүйесі топ-менеджерлерге қарастырылған. Сол сияқты, әрбір әйелде ауру не қиын сәттер үшін жинағы болуы қажет.

Неге пәтер — ең сенімсіз «жастық»?

Қазақстанда пәтерді қор жинақтайтын құрал ретінде қарайтындар көп. Бірақ сарапшы мұндай тәсілдің қауіпі барын ескертеді. Себебі, пәтерді шұғыл сату оңай емес — нарықтағы сұраныс пен ипотекаға байланысты қиындықтар бар. Төтенше жағдайда сізге ақша керек болса, пәтерді тез әрі бастапқы бағамен өткізу мүмкін емес. Сондықтан Исмағұлова өзінің формуласын ұсынады: шығындарыңыздың 3–6 айына жететін соманы депозитте ұстаңыз. Бір бөлігін — теңгемен, екіншісін — доллармен. Бұл — девальвациядан қорғанудың жолы.

Ақша аз болса да қалай жинауға болады?

Қаржыгердің бірнеше кеңесі бар: 1. "Хвостиктер әдісі". Картадағы соманы толық мыңға дейін дөңгелектеп, айырмасын жинақ шотына аударыңыз. 2. Банк ауыстыру. Көпшілік Kaspi-ді қолданады, алайда оның ыңғайлығы сізді ақшаны оңай жұмсауға итермелеуі мүмкін. Бұл үшін басқа банктен жинақ шоты ашқан тиімді. 3. Валюта жинау. Доллар немесе еуро түрінде жинау — психологиялық тұрғыдан ақшаны үнемдеуге көмектеседі. Себебі оны жұмсау қиынырақ. Сонымен қатар, сарапшы Kaspi, Halyk, BI Group сияқты ірі қазақстандық компаниялардың акцияларын қарастыруға кеңес береді. Бұл — тұрақты табыс пен дивиденд алуға жол. Инвестор Баффеттің кеңесімен: "Сатып ал да ұста, дүрбелеңге ерме" — басты қағида осы.