Әл-Фараби атындағы Қазақ ұлттық университетінде студенттердің жеке басына қатысты аса құпия деректер тағы да желіде тарап кетті. Бұл жолы жария болған ақпаратта студенттердің ішімдік ішетіні, темекі шегетіні, тіпті түсік жасатқаны туралы мәліметтер бар, деп хабарлайды Todayinfo ақпарат агенттігі.
Университеттің ішкі жүйесінде 32 мыңға жуық студент пен 5 мыңнан астам қызметкердің барлық әрекеті туралы есеп жүргізілетіні белгілі. Алайда, осындай жеке сипаттағы мәліметтердің сыртқа қалай шығып кеткені әзірге жұмбақ болып отыр. Бұл оқу орнындағы деректердің тарауына қатысты бірінші жағдай емес.
Университет басшылығы осы жайтқа байланысты ішкі тексеріс басталғанын ресми түрде мәлімдеді. Олардың айтуынша, кінәлілерді анықтап, жауапқа тарту үшін барлық шара қолданылады.
"Қазіргі уақытта ішкі тексеріс жүргізіліп жатыр. Оқиғаның мән-жайы анықталуда", - деп хабарлады университет әкімшілігі.
Бұл іске енді прокуратура органдары да араласты. Олар ақпараттың таралу себептері мен оған жауапты тұлғаларды анықтау мақсатында өз тексерісін бастады. Аса құпия деректердің жария болуы студенттер мен қоғам арасында үлкен алаңдаушылық тудырып отыр.
Фото: Әлеуметтік желіден
