Қыс мезгілі нағыз мінезін көрсете бастады. Дүйсенбі, 8 желтоқсан күні Қазақстанның бірқатар өңірінде ауа температурасы күрт төмендеп, сүйек қаритын аяз болады деп күтілуде. «Қазгидромет» синоптиктері жаңа аптаның басындағы ауа райының қауіпті құбылыстары туралы ескертті.
Синоптиктердің болжамынша, ел аумағының басым бөлігінде қар жауып, боран соғады. Жолдардағы көктайғақ пен қою тұман жүргізушілер мен жаяу жүргіншілерге қиындық тудыруы мүмкін.
Солтүстікте сақылдаған сары аяз
Әсіресе солтүстік және орталық аймақтардың тұрғындары жылы киінгені жөн. Ақмола, Солтүстік Қазақстан, Қостанай, Павлодар, Қарағанды және Ұлытау облыстарында ауа райы құбылмалы болады.
Мұнда қар жауып, бұрқасын соғады, желдің екпіні секундына 15-20 метрге дейін жетеді. Ең бастысы – температураның күрт төмендеуі. Түнде сынап бағанасы кей жерлерде -20...-28 градусқа дейін, ал қиыр солтүстікте тіпті -30 градусқа дейін төмендейді деп болжануда.
Шығыс Қазақстан мен Абай облысында да жағдай мәз емес. Қар аралас боран соғып, жолдар мұзға айналады. Түнде температура -13 градусқа дейін суытады.
Оңтүстікте тайғақ, батыста тұман
Еліміздің оңтүстік өңірлерінде (Алматы, Жетісу, Жамбыл, Түркістан, Қызылорда) ауа райы алдамшы болады. Мұнда қар аралас жаңбыр жауып, таулы аймақтарда қалың қар түседі.
Көктайғақ болу қаупі жоғары, сондықтан таулы жерлерде көлік тізгіндегендер аса сақ болғаны абзал. Ауа температурасы түнде -2...+3 градус шамасында болса, күндіз +8 градусқа дейін жылынады.
Ал батыс аймақтарда (БҚО, Атырау, Маңғыстау) жауын-шашынсыз ауа райы сақталады, бірақ қою тұман түсуі мүмкін. Тек Ақтөбе облысында қыс қаһары сезіледі: онда қар жауып, аяз -23 градусқа дейін күшейеді.
