Қытайдың әскері Тайвань маңында армия, флот, әуе күштері және зымыран бөлімдерін жұмылдырып, «ірі әскери жаттығулар» өткізетінін хабарлады. Бейжің мұны Тайваньның тәуелсіздікке ұмтылысы мен «сыртқы күштердің араласуына» қарсы «қатаң ескерту» деп сипаттады.
Бұл туралы Todayinfo порталы хабарлайды.
Жаттығу «Justice Mission-2025» деп аталады. Қытайдың Шығыс әскери аймағының (Eastern Theater Command) мәліметінше, мақсат – жауынгерлік дайындықты тексеру және «маңызды порттар мен шешуші аумақтарды оқшаулау, бақылауға алу» сценарийлерін пысықтау.
Командование жариялаған ақпаратта Тайваньды қоршайтын бес теңіз және әуе кеңістігі аймағында атыс жаттығулары өтетіні айтылған.
Тайвань не дейді?
Тайвань билігі мұндай әрекетті «әскери қысым» деп айыптады. Аралдың қорғаныс министрлігі «толық дайындық режимінде» екенін және «демократия мен еркіндік құндылықтарын қорғау үшін нақты қадамға баратынын» мәлімдеді.
Тайвань президенті кеңсесінің өкілі Карен Куо жаттығулар «Тайвань бұғазы мен Үнді-Тынық мұхиты өңіріндегі қауіпсіздік пен тұрақтылық статус-квосын өрескел бұзады» әрі «халықаралық құқық пен тәртіпке ашық сын-қатер» екенін айтты.
Соңғы жылдары Қытай Тайвань маңындағы әскери белсенділігін жиілетіп, сезімтал кезеңдерде ірі маневрлер арқылы саяси қысым көрсетіп келеді. Бұл жолғы жаттығулар да дәл сондай «сигнал беру» тактикасына ұқсайды.
Бейжіңді не алаңдатты: АҚШ келісімі және аймақтық текетірес
Қытай жағы жаттығуларды «ұлттық егемендік пен бірлікті сақтау үшін қажет, заңды қадам» деп түсіндірді. Шығыс әскери аймағының өкілі Ши И «Тайвань тәуелсіздігін жақтайтын бөлінуші күштерге және сырттан араласатындарға қатаң ескерту» екенін айтты.
Қытайдың мемлекеттік медиа алаңдарындағы сарапшылар бұған тікелей себептердің бірі ретінде АҚШ пен Тайвань арасындағы жаңа қару сату келісімін атады. Мәліметке қарай, бұл келісім «әрекеттердің өршуі» ретінде қабылданған.
Аталған ірі пакет көлемі $11,1 млрд деп көрсетіледі. Оның құрамына HIMARS залптық от жүйелері, танкке қарсы және броньға қарсы зымырандар, барлаушы-оқшау дрондар (loitering drones), гаубицалар және әскери бағдарламалық шешімдер кіреді.
Вашингтон Қытай Халық Республикасын Қытайдың жалғыз заңды үкіметі ретінде мойындайды және Тайвань Қытайдың бөлігі деген Бейжің ұстанымын «ескеретінін» айтады, бірақ Тайваньға толық егемендік талаптарын қабылдаған емес. АҚШ Тайваньмен бейресми қатынасты сақтап, заң бойынша аралдың өзін қорғауына мүмкіндік беретін қорғаныс құралдарын жеткізіп келеді.
Қытай мен Жапония да Тайваньға қатысты мәлімдемелер төңірегінде бірнеше аптадан бері дипломатиялық сөзталас жүргізіп жатқаны айтылады. Сонымен қатар Тайвань президенті қорғанысқа арналған тарихи арнайы бюджетті мақұлдатуға күш салып отыр — бұлардың барлығы Бейжіңнің наразылығын күшейтті.
Қытай Коммунистік партиясы Тайваньды өз аумағы деп санайды, бірақ аралды ешқашан толық бақылауына алмаған. Бейжің қажет болса күш қолданатынын да бірнеше рет мәлімдеген.
