Қазақстандықтардың ет тұтыну әдеті өзгеріп, сиыр етінің орнын жылқы еті басып жатыр. Елде соңғы 15 жылда жылқы етіне деген сұраныс рекордтық деңгейге жетті, деп хабарлайды Todayinfo ақпарат агенттігі.
Соңғы деректерге сәйкес, орта есеппен әрбір қазақстандық жылына 7,63 келі жылқы етін тұтынады. Бұл көрсеткіш жылқы етінің жалпы ет нарығындағы үлесін 9%-ке дейін арттырды. Сонымен қатар сиыр, қой және шошқа етіне деген сұраныс біртіндеп төмендеген.
Сарапшылар мұндай өзгерісті бірінші кезекте бағаның өсуімен байланыстырады. Мәселен, бір жыл ішінде сиыр еті 32%-ке қымбаттаса, жылқы етінің бағасы небәрі 17%-ке ғана өскен. Осылайша, тұрғындар үшін жылқы еті әлдеқайда қолжетімді баламаға айналып отыр.
Дегенмен, қазақстандықтардың жалпы ет тұтыну көлемі шарықтау шегіне жетіп, бір адамға шаққанда жылына 84,4 келіні құрады. Бірақ тұтыну құрылымында айтарлықтай өзгерістер байқалады.
Фото: Әлеуметтік желіден
