Gusto мейрамханасындағы тіл дауы: қазақша сөйлемеген әкімші жұмыстан кетті

Алматы маңындағы Шымбұлақ тау-шаңғы курортында орналасқан Gusto мейрамханасында болған тілге қатысты дау қоғамда қызу талқыланды. Желіде тараған видеодан кейін мекеме ресми мәлімдеме жасап, ішкі тексерудің нәтижесін жариялады. Мейрамхана хабарлауынша, 21 желтоқсанда тіркелген оқиға бойынша қызмет көрсету стандарттары мен корпоративтік коммуникация талаптары қайта қаралған. Тексеру қорытындысына сай әкімшінің қызметі тоқтатылып, жұмыстан босату туралы шешім қабылданған.

Мейрамхана не дейді?

Gusto бұл шешімнің ішкі тәртіп аясындағы шара екенін және оқиғаға құқықтық баға беруді көздемейтінін атап өтті. Құқықтық рәсімдер Қазақстан заңнамасына сәйкес, тараптардың қатысуымен жалғасып жатқанын мәлімдеді. Сондай-ақ мейрамхана өкілдері қонақтармен қарым-қатынаста сыйластық пен әдептілік қағидаттары қатаң сақталуы тиіс екенін айтты. Қандай жағдай болмасын дөрекі сөйлеуге немесе орынсыз сөз айтуға жол берілмейтіні ескертілді. Оқиғадан кейін ішкі регламенттер күшейтіліп, қызметкерлермен қосымша түсіндіру жұмыстары жүргізілмек. Мекеме қонақтарға қазақ, орыс және ағылшын тілдерінде қызмет көрсететінін, мемлекеттік тілді құрметтейтінін жеткізді.

Желіде не жазылды?

Оқиға туралы алғаш болып әлеуметтік желі қолданушысы жазған. Оның айтуынша, мейрамхана әкімшісі қазақ тілінде қызмет көрсетуден бас тартып, «А че разве это проблема, что если здесь никто не говорит на казахском?» деген сөз айтқан. Жазба авторы жанжал одан әрі ушығып, әкімші боқтық сөздер қолданғанын және «Я родилась в СССР и не обязана говорить и обслуживать на казахском языке», «Мне казахский язык не нужен» деген мәлімдемелер жасағанын келтіреді. Автордың сөзінше, әкімші мәселені шешудің орнына келушіні мейрамханадан қуып шығуға тырысқан, тіпті физикалық әрекетке дейін барғанын айтады. Оқиға полиция шақырумен аяқталған. Автор шамамен үш сағат уақыт жоғалтқанын, туристерінің суықта күтуге мәжбүр болғанын жазды. Айтуынша, жағдай видеоға түсіріліп, желіде жарияланған және куәгерлер де бар. Жазбада бұл оқиғаның туристік имидж қалыптасатын аймақта болғаны ерекше аталып, мемлекеттік тілді құрметтеу – тек жеке талғам емес, қоғам үшін маңызды мәселе екені айтылған.