Көлік министрлігі 2026 жылы Қазақстан бойынша жалпы ұзындығы 1,8 мың шақырымды құрайтын алты жол учаскесін ақылы жүйеге көшіруді жоспарлап отыр. Бұл өзгеріс реконструкция жұмыстары толық аяқталған және сапасы талапқа сай келетін трассаларға қатысты болмақ.
Ресми мәлімет бойынша, келесі жылы төлем жүйесі іске қосылатын негізгі бағыттар мыналар:
-
Қарағанды — Балқаш (363 шақырым);
-
Талдықорған — Өскемен (768 шақырым);
-
Атырау — Астрахань (277 шақырым);
-
Бурылбайтал — Күрті (228 шақырым);
-
Ақтөбе — Қандыағаш (96 шақырым);
-
Меркі — Шу (78 шақырым).
Бұл учаскелерде жол жөндеу жұмыстары аяқталған соң, күтіп ұстау шығындарын өтеу мақсатында ақылы жүйе енгізіледі.
Баға өсе ме және жеңіл көліктер қанша төлейді?
Ең маңызды сұрақ – тарифтер. Ведомствоның хабарлауынша, 2026 жылы жол ақысын қымбаттату жоспарда жоқ. Баға бұрынғы деңгейде қалады, бірақ жолдың санатына байланысты ерекшеленеді.
Жолдар екі санатқа бөлінеді:
-
I санат (көп жолақты магистральдар): Жеңіл көліктер үшін баға шақырымына – 2-2,5 теңге.
-
II санат (екі жолақты жолдар): Жеңіл автокөліктерден ақы алынбайды.
Ал жүк көліктері мен автобустар үшін екі санатта да төлем міндетті. Мысалы, ауыр жүк көліктері (15 тоннадан жоғары) үшін баға шақырымына 37-44 теңге аралығында болады.
Кімдер тегін жүре алады?
Заң бойынша, ақылы жолдарда жеңілдіктер қарастырылған. Төлем жасамайтындар:
-
Жедел жәрдем, өрт сөндіру және полиция қызметтері;
-
Тұрақты жолаушы тасымалдайтын автобустар;
-
Ұлы Отан соғысының ардагерлері;
-
Осы ауданда тіркелген жергілікті тұрғындар (өз ауданы ішінде жүргенде).
