Алматыда ерекше колония ашылды: Темір тор ма, әлде пансионат па?
Алматы қаласында кәмелетке толмаған сотталғандарға арналған мүлдем жаңа форматтағы мекеме жұмысын бастады. Мұндағы жағдай үйреншікті "сұр түрмелерден" өзгеше: заманауи сыныптар, спорт алаңдары және жайлы жатақхана.
Ішкі істер министрі Ержан Саденов нысанды арнайы аралап, жасөспірімдердің ұсталу жағдайымен танысты. Ең қызығы, 200 орындық бұл кешенді салуға мемлекеттік бюджеттен бір тиын да жұмсалмаған. Жоба толығымен мемлекеттік-жекеменшік әріптестік аясында инвесторлар есебінен жүзеге асқан.
Темір тордағы "BINOM" және жаңа мүмкіндік
Бұл мекеменің басты ерекшелігі – жазалауға емес, тәрбиелеуге басымдық берілуінде. Қылмысқа барған балалар мұнда уақытын бос өткізбейді. Олар әйгілі BINOM мектептерінің және колледждерінің бағдарламасы бойынша білім алады.
Тәрбиеленушілер бостандыққа шыққанда "екі қолына бір күрек" тауып кетуі үшін сұранысқа ие мамандықтарды игереді:
-
Дәнекерлеу ісі (сварщик);
-
Тігін өндірісі;
-
Шаштараз өнері.
Мекеме аумағы шағын қалашыққа ұқсайды: ішінде футбол және баскетбол алаңдары, workout-аймақ, кітапхана, акт залы және заманауи медициналық пункт бар. Психологтар мен тәрбиешілер әр баламен жеке жұмыс істеп, оларды қоғамға қайта бейімдейді.
Министрдің қатаң ескертуі
Жаңа нысанның ашылуы жақсы жаңалық болғанымен, Ішкі істер министрі Ержан Саденов бұл оқиғаға байыппен қарауға шақырды. Оның айтуынша, мұндай мекемелердің көбеюі емес, бос тұруы – қоғам үшін үлкен жеңіс.
"Мұндай мекеменің ашылуы – маңызды қадам, бірақ оны мереке ретінде қарауға болмайды. Әңгіме жасөспірімдер туралы болып отыр. Біздің басты міндетіміз – бұл мекеменің толмауына барынша жағдай жасау. Профилактика мен отбасымен жұмыс жазадан бұрын тұруы тиіс," – деп қадап айтты министр.
Бұл неге маңызды?
Қылмыстық-атқару жүйесін жаңғырту – Қазақстан үшін өзекті мәселе. Халықаралық стандарттарға сай келетін мұндай орындар жазасын өтеп шыққан жасөспірімнің қылмыстық ортаға қайта оралмауына, керісінше, білімді әрі кәсіби маман болып қалыптасуына мүмкіндік береді. "Заң мен Тәртіп" қағидаты осылайша жүзеге аспақ.
