«Тұрғындар күтіп отыр»: Берік Уәли Семей көпірін уақытылы аяқтауды тапсырды  

Фото: облыс әкімдігі Абай облысының әкімі Берік Уәли Семей қаласындағы жаңа көпірдің құрылысымен танысып, жұмыс барысын бақылап, жауапты тұлғаларға нақты тапсырмалар жүктеді, деп хабарлайды Тodayinfo ақпараттық порталы. Қазіргі таңда көпір құрылысында екі ауысымда 130-дан астам адам еңбек етуде. 9 тіреудің 5-еуі орнатылып, көпір өткелінің металл конструкциялары құрастырылып жатыр. Жыл соңына дейін негізгі бөлігі аяқталып, келесі жылы асфальт төселмек. Облыс әкімі бұл көпірдің Семей қаласы үшін стратегиялық маңызы зор екенін атап өтті. Жобаның қымбаттауына байланысты қосымша қаржыландыру мәселесі қарастырылып, оны республикалық меншікке беру мүмкіндігі талқылануда.

«Облыс мәртебесін алғаннан кейін Семей қаласында халық саны өсті. Көлік қозғалысы да көбейді. Сондықтан тұрғындар бұл көпірдің тезірек пайдалануға берілгенін күтіп отыр. Құрылысты сапалы жүргізіп, белгіленген мерзімде аяқтау керек», – деді Берік Уәли.