Қоғам назарынан түспейтін экс-министр Қуандық Бишімбаевтың төңірегіндегі дау әлі басылар емес. Бұл жолы сотталған шенеуніктің «нысанасына» оның бірінші әйелі Назым Қаһарман ілікті. Өзінің туған күнінде ол бұрынғы күйеуінен гүл емес, сотқа шақырту алған.
Бұл туралы Назым Қаһарман өзінің әлеуметтік желідегі парақшасында ашық айтты. Оның сөзінше, мерекелік таң жағымсыз жаңалықпен басталған: оған бір емес, екі бірдей сотқа шақырту қағазы келген.
«Бұл – таза психологиялық қысым»
Назымның айтуынша, темір тордың ар жағында отырған экс-күйеуі осылайша өзінің бар екенін білдіргісі келетін сияқты. Ол бұл талап-арыздарды құқықтық дау емес, адамды шаршату әдісі деп бағалайды.
Басты мақсат – балаларды әкелерімен сөйлесуге мәжбүрлеу болуы мүмкін.
«Өкінішке қарай, мұндай адамдардан құтылу өте қиын, бұл ащы шындық. Олар құрбанына соңына дейін жабысып алады. Әсіресе, егер сен жақсы адам болсаң, адалдығыңмен ерекшеленсең және көп энергия жұмсасаң, олар сені жібергісі келмейді», – деп ағынан жарылды Назым.
14 жылдық неке және ажырасу
Еске салайық, Назым Қаһарман мен Қуандық Бишімбаев 14 жыл бойы заңды некеде болған. Ортақ үш баласы бар. Ерлі-зайыптылар 2020 жылы ресми түрде ажырасқан болатын.
Кейінгі уақытта бүкіл елді дүр сілкіндірген Салтанат Нүкенованың өлімінен кейін, Назым Қаһарман бұрынғы күйеуінің тирандық әрекеттері туралы ашық айта бастаған еді. Бұл жолғы "құттықтау" да соның жалғасы іспетті.
Қазіргі таңда көпбалалы ана балаларын қорғау үшін және өзінің тыныштығы үшін күресті жалғастыруға мәжбүр.
