Жапонияда қарлы бораннан 56 көлік соқтығысты: 2 адам қаза тауып, 26 адам жараланды

Жапонияда қатты қар мен көктайғақтың салдарынан бірден 56 көлік қатысқан ірі жол апаты болды. Оқиға сенбіге қараған түні Канэцу тасжолында, Гумма префектурасындағы Минаками қаласы маңында тіркелген. Бұл туралы Todayinfo порталы хабарлайды. NTV арнасының мәліметіне қарағанда, ірі жүк көлігі қар басқан жолда тайып кетіп, бұрылыстан кейінгі өрге көтерілетін тұста тоқтап қалған. Оның артынан келе жатқан автокөліктер дер кезінде тежей алмай, соңы тізбекті соқтығысқа ұласқан. Куәгерлердің айтуынша, жол бедері күрделі болғандықтан жүргізушілер соқтығыс болған орынды алдын ала көрмей қалған. Апат кезінде бірнеше көлік отқа оранғаны да хабарланды.

Қаза тапқандар мен зардап шеккендер туралы не белгілі

Алдын ала ақпарат бойынша, жол апатынан 26 адам жарақат алған, екі адам қаза тапқан. Құрбандар саны нақтыланып жатыр. Оқиғадан кейін тасжолдың осы бөлігі екі бағытта да толық жабылып, бірнеше шақырымға созылған кептеліс пайда болған. Құтқару және жол қызметтері оқиға орнында жұмыс істеп жатыр.

Қар мен көктайғақ кезіндегі қауіп: Қазақстан үшін де таныс жағдай

Бұл жағдай соңғы уақытта Жапонияда ауа райына байланысты болған ең ірі апаттардың бірі ретінде аталып отыр. Мұндай тәуекел бізге де жат емес: қыста боран мен көктайғақ кезінде жолдағы бір қателік көп көлікті «ілестіріп» әкетуі мүмкін. Мысалы, биыл қаңтарда Ақмола облысында боранда 95 автокөлік соқтығысқан еді. Абырой болғанда, ол кезде адам шығыны тіркелмеген.