Өткен апта Жамбыл өңірі үшін тарихи сәттердің бірі болды. Аймақта бір мезетте екі маңызды өндіріс ошағының құрылысы басталды. Бұл қадам өңірдің ғана емес, тұтас елдің экономикалық дамуына тың серпін бермек, деп хабарлайды Todayinfo ақпараттық агенттігі.
Алғашқы жоба – қант зауыты. Қазақстан тәуелсіздік алғалы бері алғаш рет бой көтеретін бұл өндіріс орны шамамен 200 млн АҚШ долларына бағаланған. Зауыт жылына 1 миллион тонна қант қызылшасын қайта өңдейді және 120 мың тонна дайын қант шығарады. Сондай-ақ, зауыттың жанама өнімдері мал шаруашылығына арналған құнарлы азық дайындауға да бағытталмақ. Құрылыс толық аяқталған соң 350-ден астам жаңа жұмыс орны ашылады деп жоспарланған.
Екінші жоба – ауыл шаруашылығы техникасын шығаратын зауыт. Бұл өндіріс орны Тараз қаласының индустриялық аймағында салынып жатыр. Инвестиция көлемі – 10 млрд теңге. Жоба жүзеге асқанда жылына 2 мың дана ауыл шаруашылығы техникасы нарыққа шығарылады. Бұл – өңірдегі аграрлық саланың дамуына тың серпін беретін стратегиялық қадам.
Мемлекет басшысы Қасым-Жомарт Тоқаевтың инвестор тарту және қолайлы инвестициялық орта қалыптастыру жөніндегі тапсырмалары Жамбыл өңірінде нақты іске асуда. Облыс әкімі бастаған жауапты тұлғалар шетелдік серіктестермен келіссөздер жүргізіп, апта сайын инвесторлармен кездесулер өткізіп жатыр. Соның арқасында аймақта бірнеше ауқымды жоба қолға алынып, өңір экономиканың көшбасшы орталықтарының біріне айналып келеді.
Бүгінде жалпы құны 1,5 трлн теңгеден асатын 5 ірі жоба қарқынды жүзеге асуда. Қараша айында «Еврохим Қаратау» зауытының бірінші кезеңі іске қосылады. Бұл кәсіпорын жылына 800 мың тонна күкірт қышқылын өндіреді. Сарысу ауданында «Qazaq Soda» кальцийленген сода зауытының құрылысы қызу жүріп жатыр. «Jibek Joly» арнайы экономикалық аймағы қайта жаңғырып, аумағы 805 гектарға дейін кеңейді. Мұнда Мемлекет басшысының онлайн қатысуымен SANY компаниясының ЖЭС компоненттерін шығаратын алғашқы кешені іске қосылды. Сонымен қатар, жүгеріні терең өңдеу зауыты мен жылына 3 миллион тонна болат өндіретін металлургиялық комбинаттың құрылысы басталды. Бұл – Орталық Азиядағы ең ауқымды жобалардың бірі болып отыр.
Аймақтағы ауыл шаруашылығы саласы да инвестициядан тыс қалған жоқ. Құрылысы жүріп жатқан «Алель Агро» құс фабрикасы жылына 75 мың тонна өнім өндіруге қауқарлы. Бұл көрсеткіш былтыр облыс бойынша өндірілген жалпы ет өнімінен де асып түспек.
Фото: Freepik
