Құрамында алюминий тұздары бар антиперспиранттар сүт безі қатерлі ісігін тудыру қаупі бар деген ақпараттар жиі кездеседі.
Антиперспиранттың негізгі құрамы алюминий тұзынан тұрады. Алюминий тұзы терінің үстіне жағылған кезде, тер бездерінің түтіктерін жауып, тердің сыртқа шығуына уақытша жол бермейді. Алюминий тұздарының теріге ұзақ уақыт әсер етуінің салдарынан ағзаға қауіп төндіретіні туралы ақпараттар да кездеседі. Шындығында соңғы жылдары жүргізілген зерттеулерде, алюминийдің теріден өте нашар өтетіні және ол көбінесе ағзаға тамақ арқылы түсетіндігі анықталған.
Антиперспирантты дұрыс пайдалану ережелерін сақтаған кезде, теріге ешқандай зиянды әсері болмайды. Оны тек таза, құрғақ теріге ұйықтар алдында қолдану ұсынылады. Теріден кетіру үшін жылы сумен жуып тастау жеткілікті. Дұрыс пайдаланбаған жағдайда — қызару, күйдіру, тітіркену мәселелерін тудыруы мүмкін.
Алюминий тұздарына аллергиясы бар адамдар немесе атопиялық дерматит, экзема сияқты тері ауруларының белсенді көріністері бар болса антиперспирантты қолданбас бұрын дәрігермен кеңескені жөн.
Қазіргі таңда алюминий тұздары бар антиперспиранттар мен сүт безі қатерлі ісігі арасында ғылыми дәлелденген байланыс жоқ. Антиперспирантты дұрыс қолдану теріге зиян келтірмейді. Осыған байланысты әлемдік тәжірибеде зерттеулер жүргізіліп, АҚШ-тағы Ұлттық қатерлі ісік институты мен Денсаулық сақтау қызметі, бұл ұғымның ғылыми дәлелденбегенін растады.
Луиза Нағашыбаева
