Павлодар облысының әкімі Асайын Байханов өңірдегі шаруаларға кеңес берді, деп хабарлайды Todayinfo тілшісі.
Алдымен ол Баянауыл ұлттық табиғи паркіндегі өрттің жағдайына тоқталды.
— Өрттің аумағы шамамен – 6 мың га. Қалың өскен шөп пен желдік екпіні (12-15 м/с) жағдайды күрделендіріп отыр. Оқиға орнында өңірлік жедел штабтың отырысын өткіздім. Тілсіз жаумен қарсы күреске барлық қажет күш тартылды: 310 адам, 51 арнайы техника, 2 тікұшақ, 3 ұшқышсыз ұшу аппараты. Қазір өрт оқшауланды, өртті сөндіру жалғысып жатыр. Өңірде зардап шеккендер мен құрбандар жоқ, — деп жазды Асайын Байханов Instagram-дағы парақшасында.
Өрттің негізгі себебінің бірі – шөп шабу кезінде қолданылатын техникадағы ұшқын сөндіргіш құрылғының істемеуі. Сондықтан облыс әкімі шаруа қожалықтарына кеңес берді.
— Барлық шаруа қожалығында міндетті түрде ұшқын сөндіргіш құрылғылар болуға тиіс. Сондай-ақ қолданыстағы техникаларды тексеруді, шаруашылықтар мен үйлердің, әсіресе шөп сақталатын орындардың айналасындағы жерді уақытында жыртуды сұраймын, — деді өңір басшысы.
