Журналист Оңғар Қабден ҰҚШҰ Бас хатшысы Иманғали Тасмағамбетовтың ресейлік ақпарат құралына берген сұхбатын сынады, деп хабарлайды Todayinfo.
«Қазір ҰҚШҰ бас хатшысы Иманғали Тасмағабетов ресейлік ТАСС басылымына сұхбат беріп, ондағы пікірімен айды аспаннан бірақ шығарды. Осыдан біраз бұрын Ресей «Орешник» деген континент аралық ракета қолданғанын естіген шығарсыздар. Сұхбатында Тасмағамбетов соған қатысты пікір білдіріпті. Пікірі, енді, шынын айтсақ сәл орынсыз болған екен. Өз сөзінде Иманғали ағамыз Кремль сол ракетаны жіберуге мәжбүр болды деп, солтүстіктегі көршімізді ақтап, әлек болыпты.
Өз басым мұнысын түсінбедім. Иә, оның ұйымның бас хатшысы екенін білеміз, Ресеймен арадағы ынтымақтастық байланыс та бар, оның үстіне Астанамызда өтіп жатқан ҰҚШҰ саммиті бар. Бірақ қалай алып қарасақ та, Ресейді ақтап алатын себеп көрмей тұрмын. Иманғали ағамыздың ұлты қазақ, өмір бойы Қазақстан саясатының қазанында қайнаған адам, бүгінгі сөзі бүкіл қазақ атынан сөйлеген сөз сияқты болып тұр.
Ал қазақтар Украинаға қас емес. Украина Ресейді ракета атуға мәжбүрледі деп, қалай ауызымыз барып айтамыз?
Бояушы бояушы дегенге сақалын бояпты демекші, Ресеймен дипломатиялық қарым-қатынасты ұстап тұрамын деп Тасмағамбетов мырза сәл артық кетіп қалған сияқты.
Мұндай ашықтан-ашық соғыс жағдайында Ресейді қолдау білікті саясаткер білдіретін ұстаным емес деп ойлаймын. Тасмағамбетовке өгізді де өлтірмеуді, арбаны да сындырмауды тым болмаса Тоқаевтан үйрену керек сияқты»,- деп жазды журналист.
Фото: ҰҚШҰ баспасөз қызметі
