Қызылордада 18 жастағы жігіт қалалық «Арай» саябағындағы аттракционда болған бақытсыз оқиға салдарынан екі аяғынан айырылды, деп хабарлайды Todayinfo ақпарат агенттігі.
Облыстық көпсалалы аурухананың мәліметінше, зардап шеккен адам жедел жәрдем бригадасымен ауруханаға өте ауыр жағдайда жеткізілген.
«2007 жылы туған науқасқа шұғыл түрде ота жасалды. Сол аяқ жамбастың жоғарғы үштен бір бөлігі деңгейінде, ал оң аяқ тобық буыны деңгейінде ампутацияланды», — деді аурухана бас дәрігері Жасұлан Баймаханов.
Дәрігерлердің айтуынша, жігіттің жағдайы алған жарақаттарына байланысты өте ауыр және тұрақсыз болып қалуда.
Оқиға 15 маусымда «Арай» саябағында болған. Оқиға орнынан түсірілген видео әлеуметтік желілерде тарады. Көзәушілердің сөзінше, жігіттің аяқтары аттракцион механизміне түсіп кеткен.
Оқиғадан кейін әлеуметтік желі қолданушылары зардап шеккен адамға шұғыл қан тапсыру қажеттігі туралы ақпарат тарата бастады.
Оқиға мән-жайы анықталуда.
