Мақпал Жүнісова концертінде Заманбек Нұрқаділовты еске алып, әсерлі естелігімен бөлісті, деп жазады Todayinfo.kz ақпараттық порталы.
Қазақстанның халық әртісі Мақпал Жүнісова Республика сарайында өткен концертінде көрермендермен сыр бөлісіп, өміріндегі маңызды адам – марқұм жұбайы Заманбек Нұрқаділовты еске алды. Әнші сахнада өзінің өткен өмір жолы мен жеке тағдыры туралы айтып, көпшілікке әсерлі естеліктерімен бөлісті.
Өнер иесі сөз арасында кезінде оның айналасында жас жігіттер көп болғанын да жасырмады. Алайда ол ешқайсына көңіл аудармағанын айтып, жүрегінде ерекше орын алған адамның дәл Заманбек Нұрқаділов екенін жеткізді. Әншінің айтуынша, ол жұбайын тек өмірлік серігі ретінде ғана емес, елге сыйлы, халықтың қадірлі азаматы ретінде жоғары бағалаған.
Мақпал Жүнісова концерт барысында көрермендерді бір сәт күлдіріп те алды. Ол Заманбек Нұрқаділов жайлы әзіл аралас естелік айтып, жұртты жылы эмоцияға бөледі.
«Арғы жаққа барғанда Зәкеңмен кездесем бе деп ойлаймын кейде. Бірақ бәйбішесі барып, жанына жатып алыпты ғой. Енді екеуі сонда сырласып жатқан шығар», – деп әзілдеп айтты әнші.
Залдағы көрермендер әншінің бұл сөзіне күлімсіреп, оның шынайы әңгімесін ықыласпен тыңдады. Концерт барысында Мақпал Жүнісова өзінің танымал әндерін орындап, көрермендермен еркін әңгіме құрып отырды.
Әншінің Заманбек Нұрқаділов туралы айтқан естеліктері оның өміріндегі бұл адамның орны ерекше болғанын тағы бір мәрте көрсетті. Көпшілік те өнер иесінің шынайылығына ризашылығын білдіріп, жылы қошемет көрсетті.
