Kaspi.kz директорлар кеңесі 2026 жылдың бірінші тоқсанында акционерлерге бір американдық депозитарлық акция (ADS) үшін 850 теңге мөлшерінде дивиденд төлеуді ұсынды, деп хабарлайды Todayinfo ақпарат агенттігі.
Бұл ұсынысты финтех-холдингтің акционерлері мақұлдауы тиіс. Компанияның AIX биржасында жарияланған 2026 жылдың бірінші тоқсанындағы аудиттелмеген шоғырландырылған есебіне сәйкес, төлем таза пайданың 64 пайызын құрайды.
«Төлем мөлшері акционерлер мақұлдаған жағдайда таза пайданың 64 пайызын құрайды. Бұл ақша қаражатын генерациялауға және өсу перспективаларына деген сенімділікті көрсетеді», — деп атап өтті финтех-холдингтің негізін қалаушылардың бірі Михаил Ломтадзе.
Компанияның түсімі 2025 жылдың бірінші тоқсанымен салыстырғанда 31 пайызға артып, 1,1 триллион теңгеге (2,3 миллиард доллар) жетті. Бұл өсім тапсырыстар жиілігінің артуымен және электронды коммерция саласындағы қосымша қызметтердің қарқынды дамуымен байланысты.
Сондай-ақ, финтех-несиелеу портфелінің айтарлықтай өсуі де бұл үдеріске оң әсер етті. Электронды коммерциядағы сату көлемі бір жылда 41 пайызға өсіп, 1,3 триллион теңгеге (2,6 миллиард доллар) жетті, ал сатып алу саны 43 пайызға артты.
