Алматыда Құлжа тасжолы бойында жаңа көрме-конгресс кешенін салу жоспарлануда. Жоба аясында жалпы ауданы 0,957 гектар болатын үш жеке жер телімін мәжбүрлеп алу көзделген. Бұл туралы «Алматы қаласын дамыту орталығы» хабарлады.
Билік болашақ Expo-орталығын халықаралық форумдар, көрмелер мен іскерлік іс-шаралар алаңы ретінде көрсетеді. Қала MICE-сегментіне – қосымша табыс әкелуі тиіс іскерлік туризмге ставка жасап отыр. Құрылысқа шамамен 10 гектар жер бөлінген, оның басым бөлігі мемлекет меншігінде.
Алынатын жер телімдері: Құлжа тасжолы, 92 (0,56 га), Құлжа тасжолы, 70/2 (0,147 га) және Қорғас–Алматы трассасы бойындағы учаске (0,25 га). Басқа жерлер алынбайды. Қазіргі уақытта құжаттар жиналып, меншік иелеріне өтемақы мөлшерін анықтау үшін тәуелсіз бағалау жүргізілуде. Бір учаскеде коммерциялық нысан орналасқан, оны бұзу жоспарлануда. Тұрғын үй құрылысы жоқ.
Жобаның бастамашысы – Алматы қалалық туризм басқармасы. Қазір тұжырымдама әзірлену сатысында: нақты құны, қаржыландыру көздері мен құрылыс мерзімдері әлі белгісіз. Жеке инвесторлардың немесе МЖӘ тетіктерінің қатысуы да ашық күйінде қалып отыр. «Қаланы дамыту орталығы» мұндай алаңдар әлемде өсу нүктесіне айналатынын, іскерлік іс-шараларды тартып, шығыны жоғары туристер ағынын арттыратынын атап өтті. Алайда жобаның нақты параметрлері тұжырымдама бекітіліп, жобалық-сметалық құжаттама дайындалғаннан кейін ғана белгілі болады.
