Жамбыл облысында прокуратураның араласуы әкімшілік кедергілерді жойып, балық шаруашылығы саласындағы инвестициялық жобаны сақтап қалды, деп хабарлайды Todayinfo ақпарат агенттігі.
Байзақ ауданының прокуратурасы Бас прокуратураның инвесторлар құқығын қорғау комитетімен бірлесіп, жергілікті биліктің заңсыз бас тартуына тап болған кәсіпкердің құқығын қалпына келтірді. «Адель» шаруа қожалығының жобасы жылына 30 тоннаға дейін балық өсіруді көздейді, бұл аймақтың азық-түлік нарығына үлес қосып, жаңа жұмыс орындарын ашады.
Жобаны іске қосу үшін электр желілеріне қосылу қажет болды. Кәсіпкер Қостөбе ауылдық округінің әкімдігіне өтініш білдіргенімен, жергілікті атқарушы орган заңсыз түрде бас тартты. Прокуратура тексерісі барысында бұл шешімнің негізсіз екені анықталып, прокурорлық қадағалау актісі негізінде электр желілері тез арада тартылып, нысан қуат көзіне қосылды.
Заң бұзушылыққа жол берген лауазымды тұлға тәртіптік жауапкершілікке тартылды. Прокуратура кәсіпкерлерді әкімшілік кедергілер туындаған жағдайда +7 (775)891-25-52 немесе 115 Call-орталығына хабарласуға шақырады.
