Шығыс Қазақстан облысында үй жағдайында сүндеттеу қызметін ұсынатын адам пайда болды. Бұл туралы Ана мен бала орталығының дәрігерлері хабарлады, деп хабарлайды Todayinfo ақпарат агенттігі.
Орталықтың хабарлауынша, қазірдің өзінде бірнеше адам асқынулармен – қан кету және жараның іріңдеуімен жүгінген. Бір бала хирургия және урология бөлімшесіне жатқызылып, қазір ем алуда.
Бөлімше меңгерушісі Қайрат Рахимжановтың айтуынша, көптеген ата-ана сүндеттеуді үй жағдайында өткізуге болатын күнделікті рәсім деп санайды. Алайда дәрігерлер бұл – толыққанды хирургиялық операция екенін ескертеді.
«Барлық хирургиялық операция асептика мен антисептиканы толық сақтауды талап етеді. Ауруханада стерильді жағдайлар, қажетті жабдықтар, дәрі-дәрмектер және ең бастысы – пациенттің жағдайын әр кезеңде бақылайтын мамандар тобы бар», – деді Қайрат Рахимжанов.
Дәрігерлер ата-аналарды қауіптің толық ауқымын түсінуге және балаларының денсаулығына эксперимент жасамауға шақырады. Ыңғайлылық пен үнемдеу қайғылы жағдайға әкелуі мүмкін.
Бұған дейін Алматыда бес жасар бала жеке клиникада сүндеттеуден кейін ауыр асқынулармен ауруханаға түскені хабарланған. Баланың жағдайы бірнеше күннен кейін күрт нашарлап, органның басы қарайған. Дәрігерлер тіндердің некрозын диагностикалап, қайта операция жасауға мәжбүр болған. Аталған клиника жұмысын тоқтатқан.
