Фото: Адильбек Тауекелов
Степногорск қаласында кәсіпкерлікті дамытуға бағытталған жаңа қаржылық мүмкіндіктер ашылуда. Бұл туралы қала әкімдігі хабарлады, деп жазады Todayinfo.kz ақпараттық агенттігі.
Мәліметке сәйкес, «Даму» кәсіпкерлікті дамыту қоры «Іскер аймақ» бағдарламасы аясында Банк ЦентрКредитжәне Halyk Bankмен субсидиялау жөніндегі келісімге қол қойған.
Аталған бағдарлама шағын және орта бизнесті қолдауға, сондай-ақ кәсіпкерлердің қаржы ресурстарына қолжетімділігін арттыруға бағытталған. Әсіресе, өңірдегі кәсіп бастауға немесе бизнесін кеңейтуге ниетті азаматтар үшін бұл маңызды мүмкіндік болмақ.
Бағдарлама шарттарына сәйкес:
-
қарыздың ең жоғарғы сомасы 200 миллион теңгеге дейін жетеді;
-
мемлекет несие мөлшерлемесінің 40 пайызын субсидиялайды.
Бұл өз кезегінде кәсіпкерлердің қаржылық жүктемесін айтарлықтай жеңілдетіп, жаңа жобаларды іске асыруға жол ашады.
Қала әкімдігінің мәліметінше, «Іскер аймақ» бағдарламасы өңір экономикасын әртараптандыруға, жаңа жұмыс орындарын ашуға және шағын бизнестің үлесін арттыруға ықпал етеді деп күтілуде.
Сарапшылардың пікірінше, мұндай қолдау құралдары әсіресе өңірлік деңгейде кәсіпкерліктің белсенді дамуына серпін беріп, жергілікті нарықтың тұрақтылығын нығайтады.
