Ұлытау облысында Ұлттық Банк филиалының жаңа ғимараты ашылды

Бүгін Жезқазған қаласында Қазақстан Республикасы Ұлттық Банкінің Ұлытау облысындағы филиалы ғимаратының ресми ашылуы өтті. Салтанатты іс-шараға Ұлттық Банк Төрағасы Тимур Сүлейменов пен Ұлытау облысының әкімі Дастан Рыспеков қатысты, деп хабарлайды Todayinfo.kz ақпарат агенттігі.  Ғимарат штат санына қарай 60 қызметкерге есептелген. Мұнда арнайы сақтау қоймасы, касса қызметін көрсету аймақтары, жұмыс процесі мен қоғамдық іс-шаралар үшін арнайы орындар қарастырылған. Қолжетімді орта қағидатын іске асыру аясында қозғалысы қиын азаматтарға да жағдай жасалған. Жаңа ғимаратта музей ашу да жоспарда бар, онда ҚРҰБ банкноталары мен монеталарынан тұратын коллекция қойылып, өңірдің қаржы жүйесінің даму тарихын баяндайтын арнайы экспозиция болады. Айта кетейік, Ұлттық Банктің Ұлытау облысындағы филиалы жұмысын 2022 жылы қыркүйекте бастады. Филиал валютаны реттеу мен бақылау, айырбастау операцияларын лицензиялау, валюта келісімшарттарын тіркеу, сондай-ақ өңірде ақша-кредит саясатын жүргізу қызметтерін атқарады.