Қазақстанда өзін-өзі жұмыспен қамтыған азаматтар үшін қаржылық тәртіп түбегейлі өзгеруі мүмкін. Ұлттық банк төлем жүйесі мен банк шоттарын пайдалану ережесіне маңызды түзетулер енгізуді жоспарлап отыр.
Егер бұл құжат қабылданса, жеке және кәсіби табысты араластыруға жол берілмейді.
Арнайы шот кімдерге және не үшін қажет?
Жаңа Салық кодексінің жобасына сәйкес, кәсіпкерлік қызметпен айналысатын және өзін-өзі жұмыспен қамтыған азаматтар арнайы банк шотын ашуға міндеттелмек.
Бұл дегеніміз не? Енді сіз тауар сатсаңыз немесе қызмет көрсетсеңіз, ақшаны күнделікті қолданатын жеке картаңызға (Kaspi Gold және т.б.) қабылдай алмайсыз.
Барлық кіріс-шығыс операциялары тек жаңа режимдегі арнайы шот арқылы жүргізілуі тиіс. Бұл мемлекетке салықтық бақылауды жеңілдетіп, көлеңкелі экономиканы азайтуға бағытталған қадам.
Гранттар мен ғылымдағы өзгеріс
Өзгерістер тек жеке кәсіпкерлерге ғана емес, ғылым саласына да қатысты болмақ. Ұлттық банк ғылыми және технологиялық гранттардың жұмсалуын қатаң бақылауға алмақшы.
Енді грант қаражаты «эскроу-шоттар» арқылы аударылады. Бұл жүйе бойынша ақша үшінші тараптың шотында сақталып, жұмыс толық орындалғанда ғана төленеді. Нәтижесінде контрагенттермен есеп айырысу ашық жүргізіліп, қаржының мақсатсыз жұмсалу қаупі азаяды.
Шешім қашан қабылданады?
Әзірге бұл өзгерістер тек жоба күйінде тұр. Құжат «Ашық НҚА» порталында жарияланды және қоғамдық талқылау 22 желтоқсанға дейін жалғасады.
Егер жоба мақұлданса, қазақстандықтар қаржылық операциялардың жаңа ережелеріне бейімделуі керек болады.
