Бауыржан Омарұлының жаңа кітабы шықты: "Желіде желген жазбалар" несімен қызық?

Жаңа жыл қарсаңында Президент кеңесшісі Бауыржан Омарұлы әлеуметтік желідегі жазбалары топтастырылған жаңа кітабының жарық көргенін хабарлады. Оның айтуынша, «Желіде желген жазбалар» деп аталатын еңбек – әлеуметтік желіде туған қысқа әрі нұсқа ойлардың жинағы. Кітапты «Arna-B» баспасы шығарған. Автор бұл туындының форматы заманауи ақпараттық ортаға бейімделгенін атап өтті. Әсіресе, тез жазу мен оқуға ыңғайлылығы – бүгінгі оқырман талғамына сай келеді. Бұл туралы Todayinfo.kz ақпарат агенттігі хабарлайды. Бауыржан Омарұлы әлеуметтік желіде жазу үрдісіне тоқталып, бүгінгі ақпарат кеңістігінің талаптарына бейімделудің маңыздылығын тілге тиек етті. Оның айтуынша, аласапыран ақпарат ағынында қысқа да нұсқа ой айту – жазушы үшін басты машыққа айналған.

Неге қысқа жазу маңызды болып тұр?

Автор жасанды интеллектпен бәсекелестік те жазу стиліне әсер етіп жатқанын айтады. Ол әлеуметтік желілер жазушыны ойын нақты жеткізуге, артық баяндаудың орнына ықшам оймен бөлісуге «тәрбиелейтінін» жазды. Жинаққа жалпы көлемі аз, мағынасы терең жазбалар енгізілген. Автор бұл еңбекте фейсбук форматын толық сақтап, ойларын ықшам әрі мазмұнды түрде ұсынуға тырысқан. Мұндағы басты мақсат — әлеуметтік желідегі пост форматындағы жазбалардың да жинақ ретінде оқырман қолына ұсынылуы мүмкін екенін көрсету.

Кітап кімдерге арналған?

Бұл жинақ әлеуметтік желіде жиі жазатын авторларға, қысқа форматтағы мәтіндерді ұнататын оқырмандарға, журналистика мен медиажазбаларға қызығушыларға пайдалы болмақ. Сонымен қатар, жазу стилін дамыту, ойды нақты жеткізу дағдыларын игергісі келетін жастар үшін де таптырмас құрал. Бауыржан Омарұлы өз жазбасында: "Бүгінде желіде ұзақ-сонар жазбалар емес, ықшам, оймақтай ойлар өтімді" екенін алға тартты. Кітап осы үрдіске сай түзілген.