Есік көлі мемлекет меншігіне қайтарылды

Есік көлі мемлекеттік меншікке қайтарылды. Көл 2019 жылдың 08 сәуіріндегі қаулының негізінде жекенің басқаруына өтіп кеткен, деп хабарлайды Todayinfo агенттігі. 142 гектарға жуық жерімен бірге Есік көліндегі бөгет  49 жыл мерзімге жалға берілген. Шарт "Қазэлектроэнергия" ЖШС-мен 1 млрд 052 млн. теңге сомасына жасалған. Алайда аталған компания келісімшарттағы уәделерін орындамаған.

«2023 жылы Алматы облысының қаржы басқармасы міндеттемелердің орындалуына бақылау жүргізу барысында "Қазэлектроэнергия" ЖШС шарттық міндеттемелерінің тиісінше орындалмауын, оның ішінде қаржылық қызмет, атқарылған жұмыс туралы есептерді уақтылы ұсынбауы, көлді тазарту бойынша жоспарланған жөндеу жұмыстары мен жұмыстарды орындамауы, сондай-ақ уәде етілген жұмыс орындарын құрмағаны анықталды», - деп хабарлады Алматы облысы әкімдігінің баспасөз қызметі.

Ведомствоаралық комиссия құрылып, отырыс өткізілгеннен кейін нысанды Алматы облысының коммуналдық меншігіне қайтару туралы шешім қабылданды. Қаржы басқармасы Шартты бұзып, нысанды қайтару мақсатында сотқа талап арыз берген және Алматы облысының МАЭС 09.01.2024 жылғы шешімі негізінде шарт бұзылып, Есік көліндегі бөгет мемлекетке қайтарылды.