Қарағандылық инженерлер 3D-басып шығару саласында жаңалық жасап, инженерлер мен дизайнерлерге арналған әлемдегі алғашқы жасанды интеллект ассистентін – Никаны әзірледі. Бұл туралы Todayinfo ақпарат агенттігі хабарлайды. Ника – инженерлерге материалдар таңдаудан бастап, 3D-принтерді құрастыруға, жөндеуге және өнімді нарыққа шығаруға дейін көмек көрсететін әмбебап цифрлық көмекші.
Идея қайдан басталды?
Жоба бастамашысы – 2006 жылы резеңке-техникалық бұйымдар мен пластик шығаратын “KZ TRANSIT” ЖШС негізін қалаған Данил Ращупкин. Үш жыл бұрын ол командасымен аддитивті технология бағытына бет бұрып, өнеркәсіптік бөлшектерді 3D-басып шығару әдісімен өндіруді қолға алды. Осыдан кейін Teleport 3D атты стартап дүниеге келіп, Қарағандыдағы “Терриконовая долина” IT-хабының қолдауымен жобаға инвестиция тартылып, жедел даму сатысына өтті.
3D-басып шығарумен айналыса бастаған инженерлер көптеген техникалық қиындықтарға тап болды: дұрыс калибрленбеген принтерлер, пластиктің нашар жабысуы, кесу алгоритмдеріндегі қателер және т.б. Сол кезде жоба авторлары өздерінің тәжірибесін жасанды интеллект арқылы басқа инженерлерге ұсыну идеясын көтерді. Нәтижесінде, Ника – 3D-басып шығаруға арналған AI-ассистент дүниеге келді.
Ника – инженерлерге арналған цифрлық көмекші
Teleport3D.com бұлттық платформасында іске қосылған Ника – бұл жай чат-бот емес, нақты инженерлік көмек көрсете алатын ақылды сарапшы. Ол:
-
3D-модельдеу және басып шығару бойынша сұрақтарға жауап береді;
-
материалдар мен құрал-жабдықтарды ұсынады;
-
принтерді құрастыру және жөндеу бойынша кеңес береді;
-
Blender, SolidWorks, Cura, Fusion 360 сияқты бағдарламалық жасақтамамен жұмыс істеуге көмектеседі;
-
өнімді жылжыту мен сату стратегиясын ұсынады.
Ника 24/7 режимінде жұмыс істейді, бірнеше тілді меңгерген және пайдаланушының білім деңгейіне қарай бейімделе алады.
Бір мысал – жүздеген инженерге көмек
Ника іске қосылғаннан бері Қарағанды ғана емес, Алматы, Астана, Шымкент қалаларынан ондаған инженер мен студент жаңа ассистенттің көмегіне жүгінді. Мәселен, Алматыдан келген Артем есімді 23 жастағы инженер-тағылымдамашы SolidWorks бағдарламасында дәл тістергіш жасау тапсырмасын алған. Бюджет шектеулі, ал тәжірибелі тәлімгер болмаған.
Ника оған:
-
модельді қалай жасауға болатынын түсіндірді;
-
бюджеттік 3D-принтер таңдауға көмектесті;
-
техникалық ақауларды шешудің жолдарын ұсынды.
«Ника болмаса, мен апта бойы форумдарда мәлімет іздеп, нәтижесінде ештеңе шығара алмас едім. Ал Никамен жұмыс істеу – тәжірибелі әріптесіңмен ақылдасқандай», – дейді Артем.
Болашақ жоспары – мүмкіндіктерді кеңейту
Данил Ращупкин мен командасы Никаны дамыту жұмыстарын жалғастыруда. Олар ассистенттің функционалын кеңейтіп, оны өнеркәсіптің түрлі салаларында қолдануға бейімдеуді жоспарлап отыр. Бұл стартап Қазақстандағы ғана емес, әлемдегі 3D-технология саласындағы серпінді жобалардың бірі ретінде бағаланып отыр.
Қарағандылық инженерлердің бастамасы – Teleport 3D және оның негізіндегі Ника AI-ассистенті – Қазақстанның технологиялық дамуына қосқан елеулі үлес. Бұл жоба отандық инженерлерге әлемдік нарықта бәсекелестікке төтеп беруге, ал студенттер мен жас мамандарға өз әлеуетін ашуға мүмкіндік береді. Ника – 3D-инженерия болашағының жаңа кезеңі.
