Алматыда шетелдік сарапшылардың қатысуымен ауқымды іс-шара өтіп жатыр. Қазақстандықтар үшін дәстүрлі мереке болып саналатын «Рухани келісім күніне» орай «Тұрмыстық зорлық-зомбылықтың алдын алудағы діни бірлестіктердің рөлі» тақырыбында дөңгелек үстел өтті, деп хабарлайды Todayinfo ақпараттық агенттігі.
Шараға діни конфессиялардың көшбасшылары, мемлекеттік органдардың, үкіметтік емес ұйымдардың өкілдері, ғылыми-сараптамалық қоғамдастықтың өкілдері, шетелдік сарапшылар мен дағдарыс орталықтарының өкілдері жиналған.
«Біздің қаламызда Діни бірлестіктер көшбасшыларының клубы табысты жұмыс істеуде. Сегіз жыл бойы Әлемдік діни көшбасшылар съезінің шағын моделін еске түсіретін бұл алаң — діни бірлестіктер мен қала әкімдігі арасындағы өзара іс-қимылдың, сондай-ақ, түрлі конфессиялар өкілдері арасындағы диалог пен әріптестікті тереңдетудің тиімді құралына айналды. Әсіресе клубтың біздің қоғамды толғандыратын тақырыптардан тыс қалмайтыны қуантады. Бүгін клуб қызметі аясында біз қоғамның өзекті, көкейкесті мәселелердің шешу жолдарын бірлесіп іздейтін боламыз. Бұл Дөңгелек үстел тұрмыстық зорлық-зомбылықтың алдын алу мәселелеріне арналған», — деді Алматы қаласы Дін істері жөніндегі басқарма басшысы Нұрлан Қиқымов.
Дөңгелек үстел жұмысына осы саладағы дін қайраткерлері мен сарапшылар ғана емес, қызметі тұрмыстық зорлық-зомбылық құрбандарына көмек көрсетуге бағытталған жоғары мамандандырылған ұйымдар да, сонымен қатар, дінтану, саясаттану және мәдениеттану саласындағы жетекші сарапшылар да шақырылды.
«Шыңғыс хан ешбір дін өкілдеріне қысастық жасамаған. Осыған қарап ақ қазақ жерінде өзге дін өкілдеріне қысым жасалмағанын, еркін өмір сүріп келе жатқанын айтқым келеді. Елімізде әртүрлі дін өкілдері бірлікте өмір сүріп жатыр. Алматыда 17 діни конфессияның өкілдері бар. Тәуелсіздік жылдарынан бері түрлі діни наным-сенім өкілдері тату-тәтті тұрып келеді. Біз сіздермен мақтанамыз. Өкінішке орай түрлі жағдайларда әртүрлі қайғылы жағдайлар болып жатыр, оны ақпарат құралдары арқылы көріп, біліп жүрміз. Бүгін осы тұрмыстық зорлық-зомбылықты болдырмаудың жолдарын, проблемаларын талқылауға жиналдық», — деді басқарма басшысы.
Жиынға Испаниядан Сантьяго Де Ласала Порта мен Николас Замбоана сынды профессорлар, үндістандық профессор Кришна Котра, американдық LYN Community үкіметтік емес ұйымының президенті УЭЙД КЬЮСАК мырза және MFNN өкілі Майка Фрииз қатысып, пікірлерін білдірді.
«Әрбір үшінші отбасы тұрмыстық зорлық-зомбылықтан зардап шегіп келеді. Заң бар, онда неге зорлық көру тоқтамай келеді? Заң бар, жаңа заңнамалық ұсыныстар да қабылданып жатыр.
Үнсіз қалуға болмайды, барлықтарыңызды дағдарыс орталығына шақырам. Дағдарыс орталығының басты мақсаты отбасын сақтау. Өкінішке орай адамдар эмоциясын басқара алмайды.2021 жылы еліміздегі әрбір алтыншы бала зорлық-зомбылықтың куәгері болған. Бұл 1 миллион бала. Елімізде бұндай тұрмыстық зорлықтың қиындығын бастан өткерген бала кейін өзінің отбасына жылулық бере алмайды. Қазақстанда бала толыққанды қауіпсіз өмір сүреді деп айта алмаймыз. Әйелдер физикалық зорлық көре отырып, отбасында психологиялық қысыммен ауыр өмір сүреді. Сондықтан үнсіз қалуға болмайды», — деді «Дағдарыс орталықтары одағы» заңды тұлғалар бірлестігінің басқарма төрағасы Зульфия Байсакова.
Әртүрлі дін өкілдері өмірде орын алып жатқан проблемаларды, оны шешудің, болдырмаудың, әйелдер мен балаларды қорғаудың жолдары туралы ойларын ортаға салды.
Сондай-ақ, мереке құрметіне орай, Астана уақытымен сағат 19.00-де, Құрманғазы атындағы Қазақ ұлттық халық аспаптар оркестрінде Рухани келісім күніне арналған мерекелік концерт жоспарланған.
