Қызылордада «Заң мен тәртіп» қағидатын ілгерілету аясында Сыбайлас жемқорлыққа қарсы қызметтің облыстық департаменті тұрғындармен кездесу өткізді, деп хабарлайды Todayinfo ақпараттық агенттігі.
Шара «Азаматтарға арналған үкімет» мемлекеттік корпорациясының облыстық филиалы — Халыққа қызмет көрсету орталығында ұйымдастырылды. Іс-шараның басты мақсаты — жер телімдерін бөлу және тұрғын үй алу үдерісінде жиі кездесетін алаяқтық әрекеттердің алдын алу, түсіндіру жұмыстарын жүргізу және осы бағыттағы тиімді іс-қимылдарды күшейту.
Кездесуге Сыбайлас жемқорлыққа қарсы іс-қимыл агенттігінің Қызылорда облысы бойынша департаментінің, Полиция департаментінің өкілдері мен қалалық әкімдіктің лауазымды тұлғалары қатысты.
Жиын барысында сыбайлас жемқорлыққа қарсы жүргізіліп жатқан жаңашылдықтар таныстырылып, тұрғын үй мен жер телімдеріне қатысты алаяқтық фактілері, олардың салдары және олардан сақтану жолдары талқыланды. Құқық қорғау органдары азаматтарды алаяқтық белгілерін ажыратуға үйрету, құқықтарын қорғау және заң бұзушыларды жауапқа тарту тетіктері жөнінде ұсыныстар берді.
Сонымен қатар, шара барысында 1424 колл-орталығы арқылы сыбайлас жемқорлыққа қатысты мәселелер бойынша тегін кеңес алу мүмкіндігі және құқық бұзушылық фактілері туралы хабарлау жолдары түсіндірілді.
Іс-шара қоғам мен құқық қорғау органдары арасындағы өзара ынтымақтастықты нығайтып, тұрғындардың құқықтық сауаттылығын арттыруға бағытталды.
