Түркістан облысында жол-көлік оқиғалары артқан, деп хабарлайды Todayinfo ақпараттық агенттігі.
2025 жылдың алғашқы алты айында Түркістан облысында 579 жол-көлік оқиғасы тіркелді. Бұл көрсеткіш өткен жылдың сәйкес кезеңімен салыстырғанда 22,7%-ға жоғары.
Жол апаттары салдарынан зардап шеккендер саны да айтарлықтай өскен. 2024 жылдың алғашқы жарты жылдығында 673 адам зардап шексе, биылғы көрсеткіш 868-ге жетіп, 29%-дық өсім тіркелді. Оның ішінде жарақат алғандар саны 581-ден 731-ге дейін өсіп, 25,8%-ға артты. Ал жол апатынан көз жұмғандар саны былтырғы 92 жағдаймен салыстырғанда биыл 137 адамға жетіп, 48,9%-ға өскені байқалады.
Жол-көлік оқиғалары ең көп тіркелген аудандар мен қалалар қатарында Жетісай (89), Сайрам (82), Түркістан қаласы (71), Келес (39), Түлкібас (38), Арыс (32), Төлеби (31), Сауран (27), Сарыағаш (27), Шардара (26), Ордабасы (22), Созақ (20), Кентау қаласы (17), Отырар (17), Бәйдібек (16), Мақтаарал (14) және Қазығұрт (11) аудандары бар.
ЖКО-ның негізгі себептері ретінде жол қозғалысы ережелерін сақтамау алдыңғы қатарда қалып отыр. Атап айтқанда, жүргізушілердің белгіленген жылдамдықты асыра пайдалануы мен жаяу жүргіншілердің жолды белгіленбеген жерден кесіп өтуі жиі кездеседі.
Осыған байланысты, Түркістан облысының әкімдігі мен құқық қорғау органдары тұрғындарды, қонақтарды және өңірге келетін туристерді жол қозғалысы ережелерін қатаң сақтауға шақырады.
Айта кетейік, еліміздің жолдарында орын алатын жол-көлік оқиғалары туралы толық ақпаратты Қазақстан Республикасы Бас прокуратурасының Құқықтық статистика және арнайы есепке алу комитетінің https://gis.kgp.kz порталындағы «Авариялық карта» бөлімінен көруге болады.
Фото: Freepik
