Фото: жасанды интеллект
Қазақстан Республикасы Ұлттық қауіпсіздік комитеті ел аумағында терроризм, экстремизм және есірткі қылмыстарына қарсы күрес заң аясында жүйелі түрде жүргізіліп жатқанын мәлімдеді. Жастар арасында алдын алу шараларынан бастап, халықаралық ынтымақтастыққа дейінгі кешенді жұмыстар атқарылып жатыр. Бұл жайында Ұлттық қауіпсіздік комитетінің баспасөз қызметі Todayinfo ақпарат агенттігінің ресми сауалына берген жауабында мәлімдеді.
Бұл бағытта уәкілетті мемлекеттік органдармен бірлескен әрекет күшейтіліп, медиа ресурстарды тарту арқылы қоғам мен жастар арасында экстремизм мен терроризмнің алдын алу жұмыстары белсенді атқарылуда.
ҰҚК мәліметінше, радикалды идеологияны таратуға жол бермеу – басым бағыттардың бірі. Бұл ретте интернеттегі экстремистік контенттерді анықтау және бұғаттау бойынша нақты шаралар қолға алынған. Бұл мәселе бойынша егжей-тегжейлі ақпарат алу үшін азаматтарға Мәдениет және ақпарат министрлігіне жүгіну ұсынылады.
ҚР Үкіметі, Ішкі істер министрлігі, Денсаулық сақтау және Білім министрліктерінің үйлестіруімен «Есірткісіз болашақ» ұлттық бағдарламасы іске асырылуда. Бағдарлама аясында:
- Мектептер мен ЖОО-ларда нашақорлықтың алдын алу бойынша дәрістер, тренингтер өткізіледі;
- БАҚ пен әлеуметтік желілер арқылы арнайы материалдар таратылады;
- Жастарға наркологиялық көмек қызметтері арқылы қолдау көрсетіледі.
ҰҚК құрамындағы Шекара қызметі «Мемлекеттік шекара туралы» ҚР Заңының 66-бабына сәйкес, елге:
- жарылғыш, уландырғыш, радиоактивті заттарды,
- есірткі, қару-жарақ, оқ-дәрілер мен контрабандалық жүктерді
әкелуге және әкетуге тыйым салынған. Мұндай жүктер уәкілетті органдармен бірлесіп анықталып, дербес түрде тоқтатылады.
ҰҚК атап өткендей, есірткі қылмысына қарсы халықаралық әріптестік ерекше маңызға ие. Себебі есірткі өндірісі, тасымалы және сатылуы — жаһандық сипаттағы мәселе, оған бірде-бір мемлекет жеке күресе алмайды.
Жасырын есірткі зертханаларын анықтау ҚР заңнамасына сай жүргізілетін жедел-іздестіру шараларының нәтижесінде жүзеге асады. Ал есірткіге тәуелділерге көмек көрсету мәселесі — Денсаулық сақтау министрлігінің құзырында.
Қазіргі таңда қайта ұйымдастырылған Сыбайлас жемқорлыққа қарсы іс-қимыл агенттігінде штат санына сай функциялар мен өкілеттіктерді қайта бөлу жұмыстары қолға алынған.
