Goalkz_official Instagram парақшасының хабарлауынша, Қазақстан футбол федерациясының құрама командалар департаментінің директоры, әйгілі футболшы Руслан Балтиевтің айлығы 5 млн теңге екен. Бұл туралы әлеуметтік желіде қоғам белсендісі Оңғар Қабден жазды, деп хабарлайды Todayinfo.kz ақпарат агенттігі.
Бұған қоса, оның Rixos отелінде тұруына – 500 мың теңге, көлігіне тағы 500 мың теңге төленеді.
Балтиев қазір отбасымен Ресейдің Сочи қаласында тұрады. Бұл дерек қоғамда қызу талқыға түсіп, әлеуметтік желі қолданушылары түрлі пікір білдірді.
«Қазақстандағы қарапайым азаматтардың еңбегін бағалап, айлықты көтеру керек. Уақыт болды ғой» десе, тағы біреулер: «Бұл жалғыз ғана мысал емес, барлық спорт түрінде осындай жағдай. Ал басқа салаларда ше? Миллиондар мен миллиардтарды қалтаға басып жатқанда, халыққа тек налог пен штраф қалады. Жалақы мен жәрдемақы көтерілмейді», – деп жазды.
«Қайран елім, – деп Абай айтқандай, осындай масқарадан ел болмаймыз ғой…» деп күйінгендер де бар. «Халықтың Kaspi-ден жіберген мың теңгесін тексеріп әлек. Ал мынау деген сұмдық ақша!» деп наразылығын білдіргендер көп болды.
Бұл оқиға қоғамда әлеуметтік әділетсіздік пен спорттағы қаржы саясаты төңірегінде үлкен резонанс тудырып отыр.
Фото: ҚФФ
