Түркістан облысында заңсыз кәсіпкерлікпен айналысуға жол берілмейді. Өңірде жер қойнауын заңсыз пайдаланушылармен күрес күшейтілген түрде жүріп жатыр, деп хабарлайды Todayinfo агенттігі.
Құзырлы орган басшылары мен карьер иелерінің қатысуымен өткен кеңейтілген кеңесте жер қойнауын заңсыз пайдаланушыларға көрілетін шара, алдын алу жайттары талқыланды.
«Полиция тарапынан заң бұзушыларды анықтау бойынша жұмыстардың жүргізілуі тоқтамайды», — деді полиция полковнигі Құрманбек Сахов.
Түркістан облысында табиғатқа залал келтірушілерді анықтау мақсатында рейдтік жұмыстар тәулік бойы жүргізіліп келеді. Бұл бағытта жыл басынан бері 19 қылмыстық іс қозғалып, сотқа дейінгі тергеу жұмыстары жүріп жатыр. Заңсыз жер қойнауын пайдалану бойынша 142 тұрғын анықталған. Ал, 100-ге тарта техника айыптұрақта. Олардың ішінде экскаватор, погрузщик, КAМАЗ секілді ауыр жүк көліктері бар. Әзірге, 63 әкімшілік іс қозғалып, экология департаментімен 24 хаттама толтырылған.
Аталған мәселе аясында бірқатар баяндама жасалып, өңірде жер қойнауын пайдаланушылар, құмды-қиыршық тас, құрылысқа арналған саз топырақты заңсыз артып әкетіп жатқандармен күрес барысы талқыланды. Ал карьер иелері құрылым басшыларына өздерінің көкейдегі сауалын қойып, нақты жауап алды.
