Қырғызстанда 2024 жылдың 10 мамырынан бастап 2023 жылғы үлгідегі ұлттық валютаның жаңа бесінші сериясының номиналы 5 мың сом болатын банкнот айналымға шығарылды.
Қырғызстан Республикасы Ұлттық банкінің мәліметінше, 2023 жылғы үлгідегі бес мыңыншы банкноттың бет жағында қырғыздың көрнекті актері және суретшісі С.Чокморовтың портреті және сырт жағында «Ала-Тоо» кинотеатрының ғимараты сақталған.
Банкноттың негізгі түсі мен өлшемі де өзгеріссіз қалды. Номиналы 5 000 сомдық банкнот жалған ақша жасаудан сенімді қорғауды қамтамасыз ететін заманауи қауіпсіздік элементтерінің үш деңгейлі кешенін қамтиды.
Еске сала кетсек, 10 мамырда Қырғызстанда банк қызметкері күні атап өтіледі. Бүгін ел егемендігінің ажырамас символына айналған төл ұлттық валютасы – қырғыз сомының айналымға енгізілгеніне 31 жыл толып отыр.
