Алматы қаласының әкімі Ерболат Досаев 2023-2024 жылдардағы жылыту маусымы бойынша жұмыс кеңесін өткізді.
Алматы әкімдігінің мәліметінше, бүгінгі таңда барлық әлеуметтік нысандар мен көппәтерлі тұрғын үйлер (КТҮ – 8 863, білім беру объектілері – 404, денсаулық сақтау объектілері — 128) үздіксіз жылумен қамтамасыз етілген. Жылу көздері мен жылу желілерінде температуралық режим бекітілген кестеге сәйкес сақталады.
«Жылу беру маусымы кезінде қала қызметтері жоғары әзірлік режимінде жұмыс істеп тұр. Штаттан тыс жағдайларды уақтылы жою үшін барлық қажетті құрылғылармен жабдықталған апатты жою бригадалары жұмыс істейді. Бұл іске барлығы 400-ге жуық адам, 100-ден астам арнайы техника жұмылдырылған», — деп хабарлады әкімдікте.
Мегаполис әкімі инфрақұрылымның тозуын азайтуға бағытталған инвестициялық бағдарламаны іске асыруға баса назар аударды. Алматы қаласы бойынша жылу желілерінің жалпы тозуы 59,2%-ды құрады, өткен жылы жасалған шаралар тозуды жоспардағы 0,6%-ға емес, 1,3% — ға азайтуға мүмкіндік берді. Осылайша, биылғы жылдың басында 25 жылдан астам уақыт пайдаланылып, тозған желілердің ұзындығы 802,6 шақырым немесе желілердің барлық ұзындығының 57,9%-ын құрады.
Сондай-ақ биыл жалпы ұзындығы 20 шақырым жылу желілерін реконструкциялау жұмыстары жоспарлануда, бұл жылу желілерінің тозуын 1,8% — ға төмендетуге мүмкіндік береді.
