2 қазанда Батыс Қазақстан облысындағы Қазақстан-Ресей шекарасында жүк көліктері ұзын-сонар кезекте тұрғаны туралы ақпарат тарады.
Мәліметтерге сенсек, жүк көлігінің жүргізушілері кезек «Сырым» өткізу бекетіне дейін 20-25 шақырымға созылып жатқанын және 12 сағат ішінде тек үш шақырым ғана жүрген.
Жүк көліктерінің жүргізушілері қазіргі уақытта «Сырым» шекара бекетінде Ресейдің Самарасына қарай кезекте тұрғандарын және ұзын кезектен шағымданғандарын жеткізді.
«Мен шекара бекетіне, тіпті бекетке емес, «Сырым» бекетінен 20 шақырым жердегі кезектің соңына бүгін таңғы сағат алтыда келдім. Осы уақыт ішінде, яғни 12 сағатта бар болғаны үш шақырым ғана жүрдік. Біз қазір жанармай құю бекетінде тұрмыз, кезек өте баяу жылжып жатыр. Бұл жан айқайы ғой. Біз қалай жұмыс істейміз?! Шекарада не болып жатқанын және біз неге тоқтап қалғанымызды білмейміз!» – дейді жүргізуші Ақылбек Әдейетов.
Ол жағдайды бейнежазбамен растады. Түсірілім Бәйтерек ауданының Бейбітшілік ауылында (бұрынғы атауы Погодаево) жүргізілген.
«Бұл шекара бекетінде әрдайым осындай ұзын-сонар кезек болады. Неге? Бұл бекетті кім үшін жөндеді, мемлекет ақша салды? Неге бұл мәселені мемлекетаралық деңгейде шеше алмайды? Басқа бекеттер арқылы өтсек, онда ұзақ айналма жол жүру керек. Біріншіден, бұл уақытты жоғалтса, екіншіден, жол сапасы нашар. Мысалы, «Чаган» бекеті арқылы өтсек (Ресей жағындағы «Теплое» бекеті), онда біз қосымша ондаған шақырым жүріп өтуге мәжбүрміз. Оның бір бөлігі жолсыз жерде өтеді», – деп наразылықтарын білдірді жүк көліктерінің жүргізушілері.
«Маштаково» шекара бекетінде (жүргізушілердің айтуынша, дәл осы Ресей шекара бекеті көліктерді өткізуді баяулатып отыр) ұзақ уақыттан бері көлік кептелісі байқалды. Қазақстанның шекара қызметі мезгіл-мезгіл ресейлік әріптестерінен бекетте жөндеу жұмыстарының жүргізіліп жатқанын, жабдықтарға техникалық қызмет көрсету, немесе жүк тексеру үшін рентген аппаратының істен шыққаны туралы хабарлар алады.
Айта кетейік, соңғы рет 30 қыркүйекте Мемлекеттік кірістер департаменті РФ Орынбор облысының шекара қызметінің мәліметіне сілтеме жасап, БҚО-дағы Қазақстан-Ресей шекарасында кептелістер болуы мүмкін екенін хабарлады. 30 қыркүйек пен 1 қазанда “Маштаково” шекара бекетінде инспекциялық тексеру кешеніне техникалық қызмет көрсету жоспарланған еді.
Еске салайық, бұған дейін Қазақстанның Ақтөбе мен Батыс Қазақстан облысында жүргізушілер автогаз таппай, тағы тығырыққа тірелгенін жазған едік. Өңірде сұйытылған отын тапшы. Бекеттерде ұзын-сонар кезек пайда болып, көп жерде газ талонмен беріліп жатыр. Шенеуніктер өңірде газбен жүретін көліктер кейінгі жылдары күрт көбейіпті. Соның кесірінен ай сайын аймаққа берілетін 4 мың тоннаға жуық газ жетпей жатқанын жасырмайды.
