Алматы облысында жүргізуші полицейдің саусақтарын көлігінің есігімен қысып, сүйреп әкеткен.
Полицияның мәліметәнше, Байсейіт ауылында патрульдік полиция қызметкерлері жол ережесін бұзғаны үшін Toyota Ipsum көлігін тоқтатқан. 34 жастағы жүргізуші хаттама рәсімдеу кезінде қызметкерлердің заңды талаптарын орындаудан бас тартқан.
«Ол полицейлерді елемей, көлігіне отырып кетіп бара жатқан кезінде көлігінің есігі капитан Темірбаевтың саусақтарын қысып қалған. Көлік жедел қозғалып, офицерді шамамен 10-15 метр қашықтыққа жылдамдықпен сүйреп әкеткен. Полиция қызметкері қолын есіктен жұлып үлгерген, алайда асфальтқа құлап, жарақат алды», – делінген полиция хабарламасында.
Жүргізуші көп ұзамай ұсталып, Шелек ауылдық полиция бөліміне жеткізілген.
Билік өкіліне күш қолдану дерегі бойынша қылмыстық іс қозғалды. Жүргізуші уақытша ұстау изоляторына қамалған. Оған жол қозғалысы ережесін бұзғаны үшін әкімшілік хаттама толтырылды. Қазір тергеу амалдары жүргізілуде.
