Алматы облысының ұстаздары «Париж- 2024» жазғы олимпиадасының қола жүлдегері Назым Қызайбайға өлең арнады. Талғар ауданы Еламан ауылындағы №41 орта мектептің ұстаздары боксшы қызбен кездесу ұйымдастырды, деп хабарлайды Todayinfo ақпараттық агенттігі.
Кездесуге партия өкілдері, ауылдық ақсақалдар алқасы, №15, №26, №37, №41 мектептерінің өкілдері мен 9-11 сынып оқушылары қатысты.
«Кездесудің мақсаты оқушыларға еліміздің намысын қорғап, көптеген халықаралық жарыстарда еліміздің көк туын желбіретіп жүрген спортшымызбен таныстыру және үлгі тұту, салауатты өмір салтын насихаттап, жас ұрпақтың спортқа жақын өсуіне ықпал ету болды. Іс-шара мемлекеттік гимнмен басталды. «Жүз рет естігенше, бір рет көрген артық» деп атам қазақ айтқандай, көрген нәрсе естігенге қарағанда бала есіңде мәңгілік сақталады», — деді Талғар ауданы Еламан ауылындағы №41 орта мектептің директоры Зергүл Егінбаева.
Назым Қызайбай 2014 және 2016 жылдары бокстан Әлемнің екі дүркін чемпионы болса, Қазақстанның үш дүркін чемпионы атанған. Боксшы ару Парижден оралғалы елдің құрметіне бөленіп келе жатқанын, алайда мектепте алғаш рет кездесуге келіп, ерекше толғаныста отырғанын айтты.
«Мектептен бастап спортқа деген қызығушылығым болды, алдымен бокс емес баскетбол түрін таңдаған едім. Ауылдағы ұл балалармен дос болып, солармен бірге бокс үйірмесіне қатыстым. Әр спорт түрінің өзіне тән әдіс-тәсілдері болады, ол өздерінің жаттықтырушысының тактикасына байланысты. Болашақта Қазақстанның көк туын биікке желбірету үшін аянбай еңбек ету. Әрине, бақыттымын! Ата-анамның, бауырларымның және халқымның қолдауының арқасында, мен өзімді бақытты деп санаймын. Жазғы Париж олимпиадасынан кейін, республиканың әр өңір, әр облыстарында болсам да, мектеп қабырғасына алғаш рет шақырту алып, сіздермен жүздесіп отырмын. Мектеп табалдығын аттаған сәтте өзімнің оқушы кезім көз алдыма елестеп, ерекше сезімге бөлендім.
Құрметті оқушылар, болашақ сіздердің қолдарыңызда, білімді болумен қатар салауатты өмір салтын ұстанып, қоғамның әр саласында еңбек ететін тұлғаға айналуларыңызға тілектеспін! Осы кездесуге үлкен ат салысып, басқа шақырған Алматы қаласындағы мектептерге бармай, Сіздерге келуіме себеп болған осы мектептің қызметкерлеріне алғыс айтамын», — деді оқушылардың сұрақтарына жауап берген Назым Қызайбай.
Кездесуге келген қонақтар сөз алып, Әлем чемпионымен кездесіп, сөйлесудің орын ерекше екенін атап өтті.
Мектептің қазақ тілі мен әдебиет пәнінің мұғалімі Жұлдыз Уалихан ел намысын жоғары деңгейде қорғап, Қазақстанның атын шығарған аруға өлең арнады.
Қызайбай Назымға арнау
Бүгінгі күн ерекше есте қалмақ,
Жас өрендер өзіне тәлім алмақ.
Уа, халайық, қуана қол соғыңдар,
Чемпионмен оңаша сұхбат болмақ.
Қызайбай Назым есімі Жария күн,
Үлгісі боп қыздарға ар-ибаның.
Халқымыздың бүгінгі батыр қызы,
Сіңілісі Мәншүк пен Әлияның.
Қиындыққа Назым еш мойымаған,
Жеңіс үшін ешнәрседен тайынбаған.
Ерен еңбек, төккен тер ақталды ғой,
Чемпион ол, бүгінде әлем мойындаған.
Еңбегің зор елің үшін атқарған,
Жүлдең де көп қанжығаңда сақталған.
Чемпион боп жүре бергін есімі,
Босшылар жүрегінде жатталған.
Әлі талай биік шыңға ұшарсың,
Сан жүлдені құшағыңа қысарсың.
Тек әлемдік аренада самғай бер,
Ел жастары саған қарап күш алсын!
Кездесу мектеп оқушыларының концерттік бағдарламасымен аяқталды.
