Ауыл шаруашылығы министрі Айдарбек Сапаров елімізде үлкен сұранысқа ие Shine Muscat корей жүзімінің сапасы тексерілетінін айтты. Бұл туралы Todayinfo тілшісі хабарлады.
Мәжіліс кулуарында министрге «Shine Muscat корей жүзімінің сапасы тексерілді ме? Ол қауіпсіз бе?» деген сұрақ қойылды.
Сапаровтың айтуынша, елге әкелінген барлық өнім тексеріледі. Шекарада өнімнің сертификаты тексеріліп, мамандар сынама алып, зертханаға жібереді.
«Тағы тексергіміз келсе, өтініш жазыңыз. Сізге сараптама қорытындысын береміз», — деді министр.
Министрлік зертхана жұмысын күшейтуді жоспарлап отыр. Мысалы, ветеринария бойынша 9 жаңа құрал-жабдық алынады. Бұл өнім сапасын тексеруді жеңілдетеді.
Журналист «Корей жүзімінің дәмін татып көрдіңіз бе? Денсаулыққа қаупі жоқ па?» деп сұрағанда, министр тиісті тапсырма беретінін айтты.
«Жүзім жейтін уақыт жоқ (күліп). Жоқ, дәмін татпадым. Бүгін комитет төрағасына тапсырма берейін. Өнімнің сынамасын алып, тексерсін. Сараптама қорытындысын сіздерге қосымша берейік», — деді Сапаров.
