Ерқанат Ерғазыұлының әлемдік деңгейдегі жұлдыздармен бірлесіп жұмыс істегені туралы ақпаратты танымал концерт директоры жоққа шығарды, деп хабарлайды Тodayinfo ақпараттық порталы.
Қазақстандық ауыл мұғалімі Ерқанат Ерғазыұлының шетелдік әртістерге продюсерлік еткені жайлы ақпарат жалған болып шықты. Бұл туралы әртістер арасында кеңінен танымал менеджер және концерт директоры Данияр мәлімдеді. Ол мұндай қорытындыға 1,5 айлық зерттеу жүргізгеннен кейін келгенін айтты.
Зерттеу нәтижелері қандай?
Даниярдың айтуынша, ол алдымен Ерқанаттың шетелдік әртістердің тректерінде автор ретінде көрсетілген-көрсетілмегенін тексерген.
«Алдымен музыкалық платформалардағы credits-терді тексердім. Ерқанаттың аты көрсетілмеген соң, Genius.com сайты арқылы да іздеп көрдім. Бірақ ол жерден де ешқандай ақпарат таппадым», — дейді Данияр.
Көмек ұсынғанымен жауап болмады
Бұдан кейін Данияр Ерқанатқа көмектесуге тырысқан.
«Егер сен расымен сол әндерге продюсерлік еткен болсаң, бірақ атың автор ретінде көрсетілмесе, біз оларға айыппұл салдырып, әділдікке қол жеткізе аламыз деп айттым. Ол үшін маған тек биттердің жобасы керек болды. Бірақ Ерқанат 1,5 ай бойы үнсіз қалды, ешқандай құжат жібермеді. Тіпті менің хаттарыма жауап бермей, Instagram-дағы stories-терін жасырып тастады. Бұл оның әрекетін күмәнді етіп көрсетті», — дейді Данияр.
Тағы бір жалған ақпарат
Ерқанат өз парақшасында Pharaon есімді әншінің де тректеріне продюсерлік еткенін мәлімдеген. Алайда бұл ақпарат та жалған болып шықты.
«Мен таныстарым арқылы Pharaon-ның менеджерлеріне хабарластым. Олар Ерқанаттың ешқандай қатысы жоқ екенін айтты. Ал ең күлкілісі, Ерқанат Bad Bunny-ден хат алдым деп парақшасында жариялаған екен. Біз сол хатты тексеріп көрдік, оның мәтіні жасанды интеллект арқылы жасалған болып шықты. Тіпті хат bad.bunny.officialsinger@gmail.com аккаунтынан жіберілген. Мұндай жағдайлардан абай болыңыздар», — дейді Данияр.
Әлеуметтік желідегі парақшасын жапты
Бұл мәлімдемеден кейін Ерқанат Ерғазыұлы Instagram-дағы парақшасын өшіріп тастады. Еске сала кетейік, былтыр наурыз айында Ерқанаттың Дуа Липамен (Dua Lipa) бірлесіп жұмыс істегені туралы ақпарат тараған болатын. Ерқанат — Абай облысындағы Қараауыл ауылында қарапайым биология пәнінің мұғалімі.
Посмотреть эту публикацию в Instagram