Фото: Polisia.kz
Ішкі істер министрлігі (ІІМ) қоғамды заң мен тәртіп қағидатын сақтауға шақырып, заң бұзушылықтың салдары туралы ескертті. ІІМ өзіндік қауіпсіздік департаменті бастығының орынбасары Алтынбек Шүйіншалиев азаматтарға қоғамдық тәртіптің маңыздылығын атап өтті, деп хабарлайды Тodayinfo ақпараттық порталы.
«Құрметті азаматтар! Елімізде «Заң мен Тәртіп» қағидатын қамтамасыз ету – баршамыздың ортақ міндетіміз. Қоғамдық тәртіпті сақтау және заңға бағынатын азаматтардың құқықтарын қорғау аса маңызды. Кез келген заң бұзушылықтың соңы жауапкершілікке әкелетінін естен шығармау қажет», – деді Алтынбек Шүйіншалиев.
Оның айтуынша, ІІМ өзіндік қауіпсіздік департаменті ішкі істер органдары қызметкерлерінің өмірі мен денсаулығын қорғау бойынша барлық қажетті шараларды қабылдап жатыр. Дегенмен соңғы уақытта полиция қызметкерлеріне қарсылық көрсету және бағынбау фактілері жиілеп кеткен.
2024 жылдың қорытындысы бойынша билік өкілдерін қорлау және бағынбау деректерінің 271 фактісі тіркелген. Олардың 127-сі мас күйде жасалса, 87-сі бұрын сотталған тұлғалар тарапынан орын алған. Ал 19 жағдай бірнеше адамнан құралған топтармен жасалған құқық бұзушылықтар болып отыр.
ІІМ азаматтарды заңды талаптарға бағынуға, қоғамдық тәртіпті бұзудан аулақ болуға және құқық қорғау органдары қызметкерлеріне құрметпен қарауға шақырады.
