Алматының әйгілі Шымбұлақ тау-шаңғы курортында 28 ақпан мен 2 наурыз аралығында фристайлдан FIS әлем кубогы өтеді. Бұл туралы Todayinfo ақпарат агенттігі хабарлайды.
Бұл ауқымды жарыста могул, параллель могул және шаңғы акробатикасы сияқты негізгі сайыс түрлері қамтылады. Әлемнің 18-ден астам елінен ең мықты спортшылар қатысып, өз шеберліктерін көрсетеді. Олимпиада чемпиондары, әлем чемпионаттарының жүлдегерлері мен алдыңғы кезеңдердің жеңімпаздары да жарыста бақ сынайды. Жалпы, жарысқа 100-ден астам спортшы қатысады деп күтілуде.
FIS әлем кубогына қатысатын елдер
Жарысқа қатысушы елдер қатарында Австралия, Канада, Қытай, Чехия, Испания, Финляндия, Франция, Ұлыбритания, Германия, Ирландия, Жапония, Корея, Швейцария, Швеция, Украина, АҚШ және Қазақстан бар.
Жарыс бағдарламасы
- 25 ақпан – Қатысушы командалардың ресми келу күні
- 28 ақпан – Могул
- 1 наурыз – Параллельді могул
- 2 наурыз – Шаңғымен акробатика
Жарыстың әр күні спортшылар өзара тартысты бәсеке өткізіп, үздіктер марапатталады.
FIS әлем кубогының маңызы
2024-2025 жылғы маусымдағы FIS Әлем кубогының кезеңдері спортшылар үшін айрықша мәнге ие. Себебі бұл сайыстар 2026 жылы Италияда өтетін Қысқы Олимпиада ойындарына іріктеу кезеңі болып табылады. Яғни, қатысушылар FIS ұпайларын ғана емес, Олимпиада лицензиясын иелену үшін де бақ сынайды. Сондықтан жарыстың қызу бәсекеге толы болатыны сөзсіз.
Бұл айтулы спорттық шараны Qazsport телеарнасы және YouTube-тың FIS-TV арнасы арқылы тікелей эфирде тамашалауға болады.
Алматыдағы Шымбұлақ фристайл сайыстарына қонақтарды қарсы алуға дайын! Спорт сүйер қауымды керемет эмоция мен тартысты бәсекелер күтіп тұр.
