Алматы облысында рухани құндылықтарды жастардың арасында кеңінен насихаттау мақсатында аймақтық байқау өтті, деп хабарлайды Todayinfo ақпараттық агенттігі.
Рухани құндылықтарымызды жастарға кеңінен насихаттап, патриоттық тәрбие беру мақсатында ұйымдастырылған шараға кілең ауыл жастары қатысты. Ұлттық өнерімізді дәріптеп жүрген бір топ марқасқа ауыл жастары өзара мықтыларды анықтады. Райымбек, Кеген, Ұйғыр аудандарының мектеп оқушылары арасындағы дәстүрлі әншілер мен күйшілердің байқауына журналист, ғалым, өнертанушы Сағатбек Медеубекұлы, Қазақстанның еңбек сіңірген әртісі Рамазан Стамғазиев, Қазақстан Республикасы мәдениет саласының үздігі, әнші Тілеулес Құрманғалиев, «Құрмет» орденінің иегері, әнші, ұстаз Ұлту Қабаева сынды халыққа танымал тұлғалар арнайы қатысып, өнер тарларландары әділ-қазылық жасады.
Халықаралық және республикалық байқаулардың лауреаты Ғалымжан Досанұлы, ҚР Мәдениет қайраткері, «Ерен еңбегі үшін» медалінің иегері Рамазанның бауыры Ерлан Стамғазиевті еске алу мақсатында ұйымдастырылды.
Байқау қорытындысы бойынша «Дәстүрлі ән» номинациясында Амантұр Салтанат бас жүлде иегері атанып, қомақты қаражатқа және дипломға ие болды.
«Күй» номинациясы бойынша Айбек Сәбитұлы бас жүлде иегері атанып, оған 100 мың теңге ақшалай сыйлық табыс етілді.
Сонымен қатар, І, ІІ және ІІІ орын иегерлеріне де сый-құрмет көрсетіліп мақтау грамоталары және ақшалай сый-сияпат табыс етілді.
«Аталған шарада аудан әкімі Нұрбақыт Молдахметұлы «Бұлақ көрсең көзін аш» деген дана халқымыздың мақалын тілге тиек етіп, талантты балалардың үлкен өнерге баспалдағы осындай кіші сайыстарда шыңдалатындығын айтып өтіп, осындай игі іс-шараға ұйытқы болған Қазақстанның еңбек сіңірген әртісі Рамазан Стамғазиев және журналист, ғалым, өнертанушы Сағатбек Медеубекұлына алғысын жеткізіп, сый-құрмет көрсетті», -деп хабарлады Алматы обылсы әкімдігінің баспасөз қызметі.
