Фото: Almaty.tv
Биыл Алматы қаласында 26 мың 991 бала бірінші сынып табалдырығын аттайды. Ал олардың ішінде 15 мыңға жуық бала қазақ сыныптарын таңдаған, деп хабарлайды Todayinfo агенттігі.
Білім басқармасы басшысының сөзінше, мектептердің қазақ тілді, орыс тілді немесе аралас болуы тікелей ата-аналар тарапынан түскен өтініштерге байланысты.
«Биылғы оқу жылында 12 мектеп ашылады. Оның 9-ы таза қазақ тілінде. Тағы үш мектептің құжаттары рәсімделіп жатыр, олардың нақты қай тілдегі мектеп болатыны ата-аналардың өтінішімен де ескеріледі. Жалпы қала бойынша 57 пайызы қазақ сыныптары, 42 пайызы орыстілді немесе аралас мектептер. Мемлекеттік тілде оқитын оқушылар саны табиғи жолмен артып келеді. 1991 жылы Алматыда қазақ сыныбындағы бала саны 11 мың болса, бүгінде ол 177 мыңға жуықтады. Бірінші сыныпқа қабылдау 31 тамызға дейін жалғасады», — деді Алматы қаласы Білім басқармасының басшысы Сайран Сайфеденов.
Басқарма басшысының сөзінше, оқушыларды таситын автоубстар саны тағы да көбейеді.
«55 мектепке 10 мың 181 автобус бар. Биыл қосымша автобустар алу жоспарланған. Олардың санын 300-ге жеткіземіз», — деді ол.
Басқарма басшысы ағылшын тілін білмесе де мемлекеттің ақшасына тәжірибе жинау үшін шетелге баратын егде жастағы адамдардың бар екенін жоққа шығармады.
«Ондай адамдар бар. Бұл сұрақ біздің назарымызда. Біз олардың жасына емес, жеткен жетістігіне қараймыз. Барып келген соң беретін жұмысына назар аударамыз. Информатика пәні бойынша жас мамандар Сингапурға барып келді. Шетелден тәжірибе жинаған 25 маман «Болашақ» бағдарламасы арқылы шетелге жолдама алған», — деді басқарма басшысы.
