Алматы облысында өңірдің намысын қорғайтын балуандардың бәскесі өтті. Алғашқы белдесу облыс орталығында өтіп, «Қонаев барысы» анықталды, деп хабарлайды Todayinfo ақпараттық агенттігі.
Бүгінде елімізде «Қазақстан барысы», «Әлем барысы» сияқты турнирлер ұйымдастырылып, қазақи спорт түрлері дәріптелуде. Облыс орталығы мен аудандарда іріктеу ойындары өтті.
«Ұлттық спорт жастардың рухани санасын жаңғыртып, адамгершілікке, батылдыққа, төзімділікке, бірлікке және патриоттыққа тәрбиелейтіні сөзсіз. Қонаевта «Алатау арланы» облыстық турнирінде шаһар намысын қорғайтын балуандарды анықтайтын «Қонаев барысы» қалалық іріктеу жарысы өткізілді», -деп хабарлады әкімдіктің баспасөз қызметі.
Жарыс нәтижесінде Тәңірберген Бекнұр жеңімпаз атанды. Ал 2-орынды Мәди Еділбаев жеңіп алса, жүлделі 3-орынға Қайролда Темірлан табан тіреді. Қазақ күресі – ұлттық төл спортымыз. Қазақ күресі дәстүрлі көшпелілерде бұрынан келе жатқан ерекше өнердің бір түрі.
«Көшпелілер өнерінің жоталы бір саласы – қазақ күресінің тәрбиелік маңызы зор, ол ұлттық намысты қоздырып, көрерменге асқан шабыт сыйлайтын құдіреті биік күрес екенін тарихтан білеміз. Ал бүгінде қазақтың ұлттық спорты – күрес ешқашан тіршіліктен тыс қалмай, бірге жасасып, әлем чемпионаттарын өткізетін деңгейге дейін жетіп отыр. Ұлттық құндылықтарымыздың бірі саналады. Жастарды жақсылыққа тәрбиелеп, халықтың рухын көтеретін төл өнеріміз», -деді әкімдіктің баспасөз қызметі.
